იმედი გვაქვს, რომ არ მივალთ ინფიცირებულების იმ რაოდენობაზე და გავრცელების ისეთ სისწრაფეზე, როდესაც სრული კარანტინის გამოცხადება მოგვიწევს, თუმცა ამას არ გამოვრიცხავ, – ამის შესახებ პრემიერ-მინისტრმა, გიორგი გახარიამ საკოორდინაციო საბჭოს დასრულების შემდეგ გამართულ ბრიფინგზე განაცხადა.
„ყველაფერი დამოკიდებულია 2 რამეზე – ჩვენი ჯანდაცვის სისტემის მზაობა რაოდენობრივად რამდენ ინფიცირებულ ადამიანს შეუძლია მოემსახუროს და მეორე, რა სისწრაფით ვრცელდება ვირუსი. ეს არის ჩვენთვის დღეს 2 კრიტიკულად მნიშვნელოვანი მდგენელი. ამ მდგენელობის განვითარებიდან გამომდინარე, იქნება მიღებული სრული კარანტინის გამოცხადება“, – აღნიშნა გახარიამ.
საქართველოში კორონავირუსი 296 ადამიანს დაუდასტურდა, მათგან 69 გამოჯანმრთელდა, 3 კი გარდაიცვალა. საქართველოს კიდევ 3 მოქალაქეს კორონავირუსი სხვა ქვეყნებში დაუდასტურდა და ისინი საქართველოში აგრძელებენ მკურნალობას.
ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა.