📽რემონტი მელაძესთან ერთად – თაღლითობაში მხილებული დიზაინერი რომელიც შეკვეთებს არ ასრულებს

ავეჯის დამზადების ცნობილ ქართულ კომპანიას სერიოზული პრობლემები აქვს. “მელაძის ინტერიერი” მომხმარებლებს დიზაინერულ მომსახურებას სთავაზობს, თუმცა, როგორც ერთ-ერთი მათგანი, ანა რუსიანი აცხადებს, კომპანიის სახე და პიარ მენეჯერი ვაჟა მელაძე თაღლითური სქემით მოქმედებს.

როგორც “რუსთავი2”-ის სიუჟეტიდან ირკვევა, შპს მელაძე, რომელიც სოციალურ ქსელში დიდი პოპულარობით სარგებლობს, მომხმარებელთან აფორმებს ხელშეკრულებას, რომელიც ავეჯის ღირებულების ჯერ 70%-ს იხდის, შეკვეთის ჩაბარებამდე 10 დღით ადრე კი, მითითებულ ანგარიშზე თანხა სრულად უნდა გადაირიცხოს.

ანა რუსიანს და მის ოჯახს უკვე მინიჭებული აქვთ დაზარალებულის სტატუსი. მათ საგამოძიებო უწყებას მას შედეგ მიმართეს, რაც 25 000 ლარი მელაძის მეუღლის სახელზე რეგისტრირებულ კომპანიაში გადარიცხეს და მომსახურება ვერ მიიღეს.

ანა რუსიანისა და მისი მეუღლის გარდა, დაზარალებულის სტატუსი მთავარმა საგამოძიებო უწყებამ 10-მდე პირს მიანიჭა, თუმცა, მათ კონტრაქტი არა “შპს მელაძესთან”, არამედ “მელაძე 2021-თან” გააფორმეს. დაზარალებულებისთვის მიყენებული ზარალი, 78 546 ლარს შეადგენს.

გამოძიების მიხედვით, ეს მელაძის შვილობილი კომპანიაა, რომელის 100%-ს როლანდ ლუკაშვილი ფლობს. სწორედ ლუკაშვილი აფორმებდა კონტრაქტებს პირობების არშესრულების შემდეგ. იგი კლიენტებს უხსნიდა, რომ პასუხისმგებელი პირი ვაჟა მელაძე იყო, თავად კი კომპანიას ფორმალურად ფლობდა.

ბრალდებებს კატეგორიულად უარყოფს თავად “შპს მელაძის” წარმომადგენელი ვაჟა მელაძე. ის ამბობს, რომ დაზარალებულებს კონტრაქტები “შპს მელაძე 2021-თან” აქვთ გაფორმებული, რომელიც მასთან კავშირში არ არის და ამ კომპანიასთან უბრალოდ თანამშრომლობა აკავშირებდა. ბრალდებული ვაჟა მელაძე პასუხისმგებლობას როლანდ ლუკაშვილს აკისრებს და ამბობს, რომ თანამშრომლობა “შპს მელაძე 2021-თან” შეწყვეტილია.

მთავარმა პროკურატურამ უკვე გამოითხოვა ინფორმაცია საბანკო ანგარიშების შესახებ, რომელმაც უნდა დაადასტუროს კავშირი “შპს მელაძესა” და “მელაძე 2021-ს” შორის. მონაცემები დამუშავების პროცესშია.