“მთავარი არხის” ერთ-ერთი წამყვანი ლაშა ნაკაიძე სექსუალური ძალადობის ბრალდებით დააკავეს.
მომხდარს ეხმიანება მაუწყებლის დილის გადაცემის ერთ-ერთი რუბრიკის წამყვანი, ჟურნალისტი ელენე მარგალიტაშვილი და სოციალურ ქსელში პოსტს აქვეყნებს:
“როცა სხვა არხის თანამშრომლები რაღაც ძალიან ამორალურზე ჩუმდებიან და ისე იქცევიან, თითქოს არაფერი მომხდარა, ძალიან ვბრაზდები ხოლმე და გული მწყდება, იმიტომ რომ არსებობს რაღაცები, რაც უნდა შეიმჩნიო და რასაც გამართლება არ აქვს.
ვერავინ ვერ წარმოიდგენს, ჩვენი გუნდის წევრების გარდა, რა საშინელი და გაუსაძლისი შეგრძნებაა, როცა იგებ, რომ შენი ხელებით შეკოწიწებულ, ნაფერებ, სიყვარულით შექმნილ გადაცემაში, რომელიც ამდენი ხანია მთელი მონდომებით ცდილობს, რომ ქალები გააძლიეროს, ძალადობა დაგმოს და ყველანაირ უსამართლობას ხმალამოღებული ებრძოლოს, თურმე ზის კაცი, რომელიც ამის ჩამდენი შეიძლება იყოს.
აი, რომ გეკითხათ, გეგულება თუ არა ადგილი, სადაც ძალადობა არ არსებობსო, ვერც რომელიმე ოჯახზე დავდებდი თავს და ვერც სხვა რომელიმე ადგილზე, მაგრამ ჩემს სამსახურს თამამად დავასახელებდი. ჩემი რუბრიკა, რომლის მიზანიც ქალების გაძლიერება იყო, ხშირად წარუდგენია ლაშას, თან ისეთი სიტყვებით, რომ გული ამჩუყებია – ასეთია ძალადობა, მეგობრებო. ერთი შეხედვით ვერ ცნობ და იქ შეიძლება აღმოაჩინო, სადაც ამქვეყნად ყვეეეელაზე ნაკლებად ელოდები.საბედნიეროდ (თუ ამ ამბავში შეიძლება რამე იყოს საბედნიერო), ჩემი სამსახური ამბობს და აცხადებს იმას, რისი იმედიც მქონდა და რაშიც ეჭვი არასოდეს შემპარვია – ჩვენთან ძალადობა არ მოსულა და არც მისი რაიმე ფორმით გამართლება.
ამ მართლა საზარელი ამბის მიუხედავად, ვამაყობ, რომ სხვა არხებივით სირაქლემის პოზიცია არ გვაქვს და არც არასოდეს გვექნება. ზუსტად ამიტომ ვარ/ვიყავი ამ და არა რომელიმე სხვა არხის თანამშრომელი.
ძალიან, ძალიან, ძალიან მწყდება გული, რომ ჩვენი მზიანი და კეთილი გადაცემის ისტორიაში ასეთი ამბავი ჩაიწერა.
პ.ს. ბრალი ჯერ არ დამტკიცებია და სიმართლეს გამოძიება დაადგენს. ღმერთმა ქნას, ტყუილი აღმოჩნდეს”, – წერს ელენე მარგალიტაშვილი.
შეგახსენებთ, რომ “მთავარმა არხმა” ლაშა ნაკაიძეს კონტრაქტი შეუწყვიტა და განაცხადა, რომ გმობენ ნებისმიერი სახის ძალადობას.
ცნობისთვის, შსს-მ „მთავარი არხის“ ტელეწამყვანის ლაშა ნაკაიძის წინააღმდეგ გამოძიება 3 მუხლით დაიწყო.
როგორც “მეტრონომს” – ს შინაგან საქმეთა სამინისტროში განუცხადეს, საგამოძიებო მოქმედებების შედეგად, ლ.ნ სისხლის სამართლის კოდექსის 126-ე პრიმა მუხლის პირველი ნაწილით, 11 პრიმა 137-ე მუხლის პირველი ნაწილით და 11 პრიმა 151-ე მუხლის მე-2 ნაწილის „დ“ ქვეპუნქტით დააკავეს.
126-ე მუხლი ძალდობას, 137-ე მუხლი გაუპატიურებას, 151-ე მუხლი კი მუქარას გულისხმობს.
ცნობისთვის, სამართალდაცველებმა სექსუალური ძალადობის ბრალდებით “მთავარ არხის” დილის გადაცემის წამყვანა ლაშა ნაკაიძე გუშინ დააკავეს.
გავრცელებული ინფორმაციით, პოლიციას დასახმარებლად ახალგაზრდა ქალმა თავად მიმართა.