თბილისის საქალაქო სასამართლომ ვაკეში, მრგვალი ბაღის მიმდებარედ ჩადენილი ხულიგნობის ბრალდებით დაკავებულ 7 პირს აღკვეთის ღონისძიების სახით პატიმრობა შეუფარდა. ერთ-ერთი დაკავებული პარტია “კონსერვატიული მოძრობის” ხელმძღვანელის, პუტინისტი კონსტანტინე მორგოშიას შვილია.
“წესიერად არც ახსოვს დეტალები, რა მოხდა, შემთხვევით უბრალოდ ქუჩაში შეხვდნენ სხვა პირებს და რაზე დაიწყო დაძაბულობა, არც იცის, იმიტომ, რომ თვითონ არც იყო ჩარეული, არ მიუღია მონაწილეობა ამ ჩხუბში”. – ამბობს ტატო მორგოშიას ადვოკატი.
შინაგან საქმეთა სამინისტრომ შვიდივე პირი 11 ნოემბერს დააკავა. პროკურატურის ცნობით, ბრალდებულები ფიზიკურად გაუსწორდნენ ოთხ ადამიანს და მათ შორის ერთ-ერთს – სხეულის სხვადასხვა ადგილას ჭრილობები მიაყენეს.
“ბრალდებულებმა უხეშად დაარღვიეს საზოგადოებრივი წესრიგი, მათ შორის, შეაფერხეს საავტომობილო მოძრაობა და ქვეითთა გადაადგილება, რითაც საზოგადოებისადმი გამოხატეს აშკარა უპატივცემულობა.
დაკავებულებს ბრალდება საქართველოს სისხლის სამართლის კოდექსის 239-ე მუხლის მე-2 ნაწილის “ა” ქვეპუნქტით (ხულიგნობა, ქმედება, რომელიც უხეშად არღვევს საზოგადოებრივ წესრიგს და გამოხატავს საზოგადოებისადმი აშკარა უპატივცემულობას, ჩადენილი ძალადობით და წინასწარი შეთანხმებით ჯგუფის მიერ) წარედგინათ, რაც სასჯელის სახედ და ზომად ხუთ წლამდე თავისუფლების აღკვეთას ითვალისწინებს”. – წერს პროკურატურა.