ქობულეთში ურთიერთშელაპარაკების ნიადაგზე 21 წლის ბიჭი მოკლეს.
როგორც მეზობლები “მთავარ არხთან” აცხადებენ, მკვლელობის მიზეზი მოპარული ტელეფონი გახდა.
“კაფეში შესულა, ცეკვავდა და ტელეფონი დარჩენია. ვიღაცას აუღია და იმისთვის უთქვამს, მომეცი ჩემი ტელეფონიო, არაო და მერე იმას დანა დაურტყია”, – აცხადებს ერთ-ერთი მეზობელი.
მეორე მეზობელი ასევე აცხადებს, რომ მკვლელობა ტელეფონის გამო მოხდა.
“ტელეფონი მოუპარიათ და მაგის გამო მომხდარა შემდეგ მკვლელობა. გორელია ის ბიჭი ვინც მოკლა. როგორც ვიცი დაკავებულია”, – აცხადებს გარდაცვლილი ბიჭის მეზობელი.
შინაგან საქმეთა სამინისტროს აჭარის პოლიციის დეპარტამენტის თანამშრომლებმა, ცხელ კვალზე ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, 1992 წელს დაბადებული, წარსულში ნასამართლევი ლ. ი. ჯანმრთელობის განზრახ მძიმე დაზიანების ბრალდებით დააკავეს.
„გამოძიებით დადგინდა, რომ ბრალდებულმა, მიმდინარე წლის 13 აგვისტოს, ქობულეთში, ურთიერთშელაპარაკების ნიადაგზე, ცივი იარაღის გამოყენებით ჭრილობა მიაყენა 2001 წელს დაბადებულ რ.ლ.-ს და შემთხვევის ადგილიდან მიიმალა. დაჭრილი ახალგაზრდა მოგვიანებით სამედიცინო დაწესებულებაში გარდაიცვალა.
სამართალდამცველებმა ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, ლ.ი. ცხელ კვალზე – მომხდარიდან რამდენიმე საათში დააკავეს“, – აღნიშნულია ინფორმაციაში
უწყების ცნობით, გამოძიება საქართველოს სისხლის სამართლის კოდექსის 117-ე მუხლით მიმდინარეობს, რაც ჯანმრთელობის განზრახ მძიმე დაზიანებას გულისხმობს. ისჯება თავისუფლების აღკვეთით ვადით ოთხიდან შვიდ წლამდე, იარაღთან დაკავშირებული უფლებების შეზღუდვით ან უამისოდ.