ცაგერისა და ლენტეხის და მესტიისა და ზემო სვანეთის ეპარქიების მმართველები ქვემო და ზემო სვანეთის საზღვარზე მდებარე მიწების ფლობასთან დაკავშირებით წარმოქმნილ უთანხმოებასთან დაკავშირებით განცხადებას ავრცელებენ.
“ჩვენი ეპარქიების მოსახლეობის გარკვეულ ნაწილს შორის წარმოქმნილი უთანხმოება, რომელიც დაკავშირებულია ქვემო და ზემო სვანეთის საზღვარზე მდებარე მიწების ფლობასთან, ნებსით თუ უნებლიედ, იწვევს სადავო საკითხში ეკლესიის ჩართვის მცდელობას, რადგან ამ ტერიტორიაზე მდებარეობს ლატფარის წმინდა ლუკა მახარებლის სახელობის ტაძარი”, – აცხადებენ ისინი და სამხარეო ადმინისტრაციებს და შესაბამის უწყებებს სადავო საკითხის მოგვარებისკენ მოუწოდებენ.
“ხელისუფლების მიერ ზუსტად დადგენილი ადმინისტრაციული საზღვრების მიხედვით ვიმოქმედებთ ჩვენც, რადგან ზემო და ქვემო სვანეთის ადმინისტრაციული საზღვარი განსაზღვრავს ჩვენი ეპარქიების იურისდიქციის ფარგლებს და, შესაბამისად, ამა თუ იმ ტაძრის კუთვნილების საკითხსაც,” – ნათქვამია ჭყონდიდის, ცაგერისა და ლენტეხის მიტროპოლიტის სტეფანესა და მესტიისა და ზემო სვანეთის მიტროპოლიტის ილარიონის ერთობლივ განცხადებაში.