მწვერვალ თეთნულდზე ტურისტთა 6-კაციანი ჯგუფის სამაშველო ოპერაცია დასრულდა. ერთ-ერთი ტურისტი, რომელიც ნაპრალში იყო ჩავარდნილი, დაიღუპა, ხოლო დანარჩენი ხუთი პირი მესტიის კლინიკებში არიან გადაყვანილი.
ერთ-ერთი ექიმის თქმით, მათ კლინიკაში მოთავსებული ორივე ტურისტი რუსეთის მოქალაქეა და მათ მკერდის ნეკნის და წვივის ძვლის მოტეხილობა აღენიშნებათ.
“ორი მოიყვანეს რუსეთის მოქალაქე, ალექსეი ლიტვინენკო და ალისა შტაკი. მათ მოტეხილობები და დაჟეჟილობები აღენიშნებათ. რაიმე საგანგაშო და სასიკვდილო არაა. წესით, კარგი იქნებოდა კომპიუტერული ტომოგრაფია, მაგრამ აქ არ არის, მესტიაში”, – აცხადებს “მთავარ არხთან” ექიმი ავთანდილ გვალია.
კიდევ სამი ტურისტი კი, რომლებიც არსებული ცნობით ასევე რუსეთის მოქალაქეები არიან, უფრო მსუბუქ მდგომარეობაშია, ისინიც მედიკოსების მეთვალყურეობის ქვეშ რჩებიან.