კახეთში, წნორში 17 ივნისს დატრიალებული ტრაგედია დღემდე ბურუსითაა მოცული. 8 წლის გიორგი ყანდაშვილი საკუთარ სახლთან ახლოს, სანიაღვრე არხში ნახეს გარდაცვლილი.
პოლიციის ოფიციალური ვერსიით, ბავშვი არხში ჩავარდა და დაიხჩო, თუმცა ოჯახს ამის არ სჯერა და არაერთ გარემოებაზე მიუთითებს. “მთავარი არხის” ცნობით, ვრცელდება ინფორმაცია, რომ 8 წლის გიორგი ყანდაშვილს წნორის პოლიციის უფროსის მეუღლე დაეჯახა, რომელიც საჭეს ნასვამ მდგონარეობაში მართავდა.
“არ მჯერა მე ამათი გამოძიების. არ მუშაობენ სათანადოდ. ყოველდღიურობით გვაჭმევენ ამ ექსპერტიზის პასუხს. დღეს მიკავშირდება პოლიციელი. მეუბნება, რომ არაო, ვერანაირად ვერ მოგვაქვს ეს პასუხებიო. მე ხომ ვნახე ჩემი შვილი როგორი დაზიანებული იყო. მე ხომ ჩემს შვილს ძალიან კარგად ვიცნობდი. რამდენად შეძლებული იყო ჩემი შვილი. საბოლოო პატივი ვინც მიაგო, ანუ, გამოუცვალა და ტანისამოსი ჩააცვა, იმ ადამიანიდან ვიცი, რომ მე როგორც შევხედეო, ბავშვს მოტეხილობებიც ჰქონდაო და ეხლა რა წყალი იყო იქ იმისთანა, რომ 8 წლის ბავშვი ასე დააზიანა. ეს რომ თავად ბავშვს არ მოუვიდოდა, მაგაში ვერ დამარწმუნებენ, ეს გამორიცხულია და რატომ მოდის ეს საუბრები, რომ არის ნახსენები პოლიციელის მეუღლე. [წნორის პოლიციის უფროსის მეუღლე]. რატომ ლაპარაკობს ახლა, მე ვიძახდი რომ მე კონკრეტულად თითს არ ვადებ არც იმ ადამიანს და არავის, უბრალოდ ხალხის საუბრებიდან ვლაპარაკობ მეც” – ამბობს გარდაცვლილი ბავშვის მამა.