„ხალხის ძალის“ თავმჯდომარის, საქართველოს პარლამენტის თავმჯდომარის მოადგილის, სოზარ სუბარის განცხადებით, ჩეხეთი ეწინააღმდეგება ბრიუსელის ყველა იმ პოლიტიკას, რომელიც შეიძლება, ჩეხეთის სუვერენიტეტის განმტკიცებისკენ არ იყოს მიმართული.
სუბარის თქმით, აქედან გამომდინარე, მნიშვნელოვანია საქართველოს საპარლამენტო დელეგაციის ვიზიტი ევროკავშირის წევრ ჩეხეთში, მათთან თანამშრომლობა და გამოცდილების გაზიარება.
„ჩვენთვის ჩეხეთი საინტერესო ქვეყანაა, რადგან ბოლო ერთი წელია, ჩეხეთს მართავს მთავრობა, რომელსაც მთავარი აქცენტი აქვს ქვეყნის სუვერენიტეტის განმტკიცებაზე. ჩეხეთი, 20 წელზე მეტია უკვე, ევროკავშირის წევრია, თუმცა ცდილობს, სწორედ ევროკავშირის წევრობის ფარგლებში დაიცვას და განამტკიცოს თავისი სუვერენიტეტი და ეწინააღმდეგება ბრიუსელის ყველა იმ პოლიტიკას, რომელიც შეიძლება, ჩეხეთის სუვერენიტეტის შემცირებისკენ იყოს მიმართული, ჩეხეთის ინტერესებისთვის არ იყოს საინტერესო და, პირიქით, ჩეხეთის ინტერესების საწინააღმდეგო იყოს. ჩვენთვის ძალიან დიდი მნიშვნელობა აქვს იმ მთავრობასა და პარლამენტთან ურთიერთობას, რომელიც ამ პოლიტიკას ირჩევს. საინტერესოა მათი გამოცდილების გაზიარებაც“, – აღნიშნა სოზარ სუბარმა.
სუბარის განმარტებით, ჩეხეთს საქართველოსთან მჭიდრო ურთიერთობები აქვს, რადგან ერთ-ერთი მსხვილი ინვესტორია ქვეყანაში.
„ბოლო 10 წლის განმავლობაში ნახევარ მილიარდ დოლარზე მეტი ინვესტიცია აქვს გაკეთებული, ვაჭრობაც საკმაოდ ინტენსიურია. სამწუხაროდ, ამ ვაჭრობაში ჩვენი ექსპორტი ძალიან მოიკოჭლებს, დაახლოებით 12-ჯერ მეტია ჩეხური იმპორტი საქართველოში, ვიდრე ჩვენი ექსპორტი. ეს გასაგებიცაა, რადგან ჩეხეთი ავტომობილებს აწარმოებს, ბაზარზე ერთ-ერთი მსხვილი პუნქტია ევროკავშირში. ჩვენც ისეთი რაღაცები გვაქვს, რაც შესათავაზებელია. ამ მხრივ მნიშვნელოვანი იქნება პარლამენტის თავმჯდომარესთან შეხვედრა არა მხოლოდ პარლამენტში, არამედ მრეწველობა-ვაჭრობისა და თავდაცვის მინისტრებთანაც“, – განაცხადა სოზარ სუბარმა.
საქართველოს პარლამენტის თავმჯდომარე შალვა პაპუაშვილი, საპარლამენტო დელეგაციასთან ერთად, პრაღაში ჩეხეთის დეპუტატთა პალატის თავმჯდომარის, ტომიო ოკამურას ოფიციალური მიწვევით გაემგზავრა.