მედიის ადვოკატირების კოალიცია ბერა ივანიშვილის მიერ ” ტვ პირველის“ და „ფორმულას“ წინააღმდეგ შეტანილ სასამართლო სარჩელს განცხადებით ეხმაურება.
ორგანიზაცია მიიჩნევს, რომ ბერა ივანიშვილის სარჩელი ორი მედიის წინააღმდეგ ბიძინა ივანიშვილის და „ქართული ოცნების“ მხრიდან დამოუკიდებელი მედიის წინააღმდეგ მიმართული სისტემური ზეწოლის პოლიტიკის გაგრძელებაა.
„ეს საჩივრები თავისი არსით აშკარად ატარებს სამოქალაქო ჩართულობის წინააღმდეგ სტრატეგიული სარჩელების (SLAPP) ხასიათს და მათი გამოყენება არ ემსახურება რეპუტაციის დაცვის ლეგიტიმურ მიზნებს, პირიქით, ეს არის ბიძინა ივანიშვილის ოჯახის მიერ სახელმწიფო უწყებებზე, მათ შორის სასამართლოზე, საკუთარი ზეგავლენის გამოყენება დამოუკიდებელი მედიის გასაჩუმებლად. მსგავსი დავები იქცევა ცენზურის დაწესების, საზოგადოებისთვის მნიშვნელოვანი გამოძიებებისა და ინფორმაციის მიწოდების შეზღუდვის იარაღად.
მზარდი რეპრესიებისა და სისტემური ზეწოლის ფონზე, მედიის ადვოკატირების კოალიცია სრულ სოლიდარობას უცხადებს „ტვ პირველს“, „ფორმულას“ და ყველა იმ დამოუკიდებელ ჟურნალისტს, რომლებიც აგრძელებენ პროფესიული მოვალეობის შესრულებას. თავისუფალი მედია არის დემოკრატიული სახელმწიფოს მთავარი საყრდენი და ვერანაირი შანტაჟი თუ სარჩელი ვერ აიძულებს მათ, შეწყვიტონ სიმართლის თქმა და საზოგადოების ინფორმირება“ – წერს მედიის ადვოკატირების კოალიცია.
3 ნოემბერს ცნობილი გახდა, რომ ბერა ივანიშვილმა კრიტიკული სარედაქციო პოლიტიკის მქონე ტელევიზიებს, „ტვ პირველისა“ და ტელეკომპანია „ფორმულას“ უჩივლა.როგორც „ნეტგაზეთს“ ბერას ადვოკატმა, დავით ასათიანმა განუცხადა, ივანიშვილი ითხოვს მის შესახებ გავრცელებული დეზინფორმაციის შესაბამისი ფორმით უარყოფას.