ბინების ძარცვაში ბრალდებული სამი ქართველი ესპანეთიდან საქართველოში გამოაძევეს. ამის შესახებ ადგილობრივი მედია წერს.
გამოცემის ცნობით, საქმე ეხება ქურდობებს, რომლებიც გასულ ზაფხულს არაგონის დედაქალაქში მოხდა.
მედიის ცნობით, ქართველებმა გატეხეს ერთ-ერთი სახლის კარი და მეზობელ სახლებშიც ასე შედიოდნენ. სახლიდან წაღებული იყო ნებისმიერი ნივთი, რასაც კი ქურდები ნახავდნენ, არა მხოლოდ სამკაული და ფული.
ეროვნული პოლიციის პრესრელიზში ნათქვამია, რომ მოვლენები 2021 წლის ივლისში მოხდა, როდესაც არაგონის დედაქალაქში, ერთ კორპუსში რამდენიმე ბინა გაძარცვეს. ქართველები კი პოლიციამ 2021 წლის 11 ივლისს დააკავა.
ცოტა ხნის წინ, სარაგოსას პროვინციულმა სასამართლომ გამოსცა საბოლოო გადაწყვეტილება და მათთვის პატიმრობა ესპანეთის ტერიტორიიდან დაუყოვნებლივ გაძევებით შეცვალა. ქართველებს ესპანეთში ხელახლა შესვლაც აეკრძალათ მინიმუმ 5 წლის განმავლობაში.