საქართველოში თითქმის ყოველი მე-4 ბავშვი სიღარიბის ზღვარს მიღმა ცხოვრობს. ამაზე მიუთითებს სოციალური მომსახურებისა და სტატისტიკის ეროვნული სამსახურის მონაცემები.
უფრო კონკრეტულად, სოციალური მომსახურების სააგენტოს ბოლო, სექტემბრის მონაცემებით, საქართველოში საარსებო შემწეობას 219 054 ბავშვი იღებს (0-დან 18 წლის).
სტატისტიკის ეროვნული სამსახურის ოფიციალური მონაცემებით კი, ქვეყანაში ამ ასაკობრივი ჯგუფის 970 609 პირია რეგისტრირებული.
შესაბამისად, აღნიშნული მონაცემები აჩვენებს, რომ საქართველოში ყოველი მეოთხე ბავშვი სიღარიბის ზღვარს მიღმა ცხოვრობს.
ამასთან, სოციალური მომსახურების სააგენტოს სტატისტიკითვე, სოციალურად დაუცველი ბავშვების ყველაზე მაღალი მაჩვენებელი (მოსახლეობის რაოდენობიდან გამომდინარე) თბილისში ფიქსირდება (52 694 ბავშვი). მეორე ადგილზეა ქვემო ქართლის რეგიონი 39 923 ბავშვით, ხოლო მესამეზე – იმერეთი (25 356 ბავშვი).
რეგიონების მიხედვით საარსებო შემწეობის მიმღები 0-დან 18 წლამდე ასაკის ბენეფიციარების რაოდენობა ასე გამოიყურება:
თბილისი – 52 694;
ქვემო ქართლი – 39 923;
იმერეთი – 25 356;
სამეგრელო-ზემო სვანეთი – 22 015;
აჭარის ავტონომიური რესპუბლიკა – 22 668;
კახეთი – 15 816;
შიდა ქართლი – 15 799;
გურია – 7 152;
სამცხე-ჯავახეთი – 5 389;
მცხეთა-მთიანეთი – 6 389;
რაჭა-ლეჩხუმი და ქვემო სვანეთი – 1 960.
რაც შეეხება ასაკობრივ გადანაწილებას, მაჩვენებელი უფრო მაღალია 6-18 წლის ასაკობრივ კატეგორიაში, სადაც სიღარიბის ზღვარს მიღმა 168 595 პირია რეგისტრირებული. 0-6 წლის ასაკობრივ სეგმენტში კი 50 459 ბავშვია აღრიცხული.