ერგო მეთოფიშვილისთვის ოპოზიციური პარტიების აკრძალვის საქმე პირველია, რომელსაც ის საკონსტიტუციო სასამართლოს წევრის რანგში განიხილავს.
65 წლის მეთოფიშვილი 17 წელია, რაც მოსამართლეა. თუმცა, საკონსტიტუციოს მოსამართლეთა კოლეგიას ცოტა ხნის წინ, 23 სექტემბერს შეუერთდა.
საკონსტიტუციოს მოსამართლედ არჩევიდან ზუსტად ერთ თვეში, 23 ოქტომბერს მეთოფიშვილი თავმჯდომარის, რევაზ ნადარაიას მოადგილედ აირჩიეს.
იურისტები და არასამთავრობო ორგანიზაციები, რომლებიც წლების განმავლობაში აკვირდებიან ქართული სასამართლო სისტემის მუშაობას, მეთოფიშვილს ე.წ. კლანის წევრად მოიხსენიებენ.
„ბათუმელებმა“ მოკლედ შეაჯამა სერგო მეთოფიშვილის პროფესიული საქმიანობა და საჯარო განცხადებები.
მოსამართლე, რომელმაც გაასაჩივრა საკუთარი ქონებრივი დეკლარაციის შემოწმების გადაწყვეტილება
სერგო მეთოფიშვილი იყო იმ ოთხ მოსამართლეს შორის, რომლებმაც სასამართლოში გაასაჩივრეს თავიანთი ქონებრივი დეკლარაციის შემოწმების პროცედურა. მეთოფიშვილის გარდა საჩივარი დაწერა აშშ-ის მიერ „მნიშვნელოვან კორუფციაში ჩართულობისთვის“ სანქცირებულმა ლევან მურუსიძემ და მიხეილ ჩინჩალაძემ. ასევე ორგანიზაციების მიერ კლანის წევრად მიჩნეულმა კიდევ ერთმა მოსამართლე ვასილ მშვენიერაძემ.
ანტიკორუფციული ბიურო (2026 წლიდან ეს უწყება გაუქმდა და მისი ფუნქციები აუდიტის სამსახურმა შეითავსა) ყოველწლიურად ამოწმებდა თანამდებობის პირთა ნაწილის ქონებრივ დეკლარაციებს. თუ ვისი დეკლარაცია უნდა შემოწმებულიყო ყოველ წელს, სპეციალური ელექტრონული პროგრამა შემთხვევითი შერჩევის წესით არჩევდა. 2024 წელს უწყების ბაზაზე შექმნილ დამოუკიდებელ კომისიას 300 პირის შესწავლა დაევალა. მათ შორის იყო 27 მოსამართლე.