ფრაქცია „საქართველოსთვის“ პარლამენტს მარტოხელა მშობლებისთვის დადგენილი საგადასახადო შეღავათის გაზრდის ინიციატივით მიმართავს

ფრაქცია „საქართველოსთვის“ პარლამენტს მარტოხელა მშობლებისთვის დადგენილი საგადასახადო შეღავათის გაზრდის ინიციატივით მიმართავს.

ოპოზიციურმა ფრაქციამ პარლამენტს “საგადასახადო კოდექსში“ ცვლილებები წარუდგინა, რომლის მიხედვით, მარტოხელა მშობლების საშემოსავლო გადასახადისგან გათავისუფლების 3 000-ლარიანი ზღვარი, 15 000 ლარამდე იზრდება.

მოქმედი საგადასახადო კანონმდებლობა გარკვეული კატეგორიის ფიზიკური პირების საშემოსავლოს გადასახადით დაბეგვრისგან გათავისუფლებას ითვალისწინებს. მათ შორის მარტოხელა მშობლები არიან, რომლებიც წლიურად 3 000 ლარამდე შემოსავლის პირობებში, საშემოსავლო გადასახადისგან გათავისუფლებული არიან. როგორც ინიციატორები განმარტავენ, აღნიშნული ზღვარი შეღავათის ეფექტიანობას ვერ უზრუნველყოფს. კერძოდ, 3 000 ლარი წლიურად თვეში საშუალოდ 250 ლარს შეადგენს. შესაბამისად, 20%-იანი საშემოსავლო გადასახადის პირობებში, აღნიშნული შეღავათის გამოყენების მაქსიმალური საგადასახადო ეფექტი ერთ ბენეფიციარზე წელიწადში – 600 ლარს, თვეში კი საშუალოდ 50 ლარს შეადგენს.

“ასეთი ოდენობის საგადასახადო შეღავათი ფაქტობრივად გავლენას არ ახდენს მარტოხელა მშობლის განკარგვად შემოსავალზე და ვერ ქმნის საკმარისს ეკონომიკურ ეფექტს ოჯახის ფინანსური მდგომარეობის შესამსუბუქებლად“, – აცხადებენ კანონის პროექტის ინიციატორები.