უკრაინის პარლამენტის წევრი ლიზა იასკო მიხეილ სააკაშვილთან, რომელთანაც საერთო ქალიშვილი, ჟასმინი ჰყავს – სამართლებრივ დავაშია. ამის შესახებ უკრაინული მედია წერს.
გამოცემის ინფორმაციით, 2026 წლის აპრილიდან იგი სასამართლოს მეშვეობით სააკაშვილისთვის ალიმენტის გადახდის დაკისრებასა და მისთვის მშობლის უფლებების ჩამორთმევას ითხოვს. ადვოკატის განცხადებით, ალიმენტის გადახდის საკითხი ბევრად უფრო ადვილად გადასაჭრელია, ვიდრე მშობლის უფლებების ჩამორთმევა.
სასამართლო პროცესი 2026 წლის აპრილიდან მიმდინარეობს. კანონმდებელი ითხოვს ალიმენტს მათი ქალიშვილისთვის და სააკაშვილისთვის მშობლის უფლებების ჩამორთმევას. იასკომ ქალიშვილის დაბადების შესახებ 2023 წლის 1 ივნისს გამოაცხადა. გოგონას მამა მიხეილ სააკაშვილია.
2021–2022 წლების ქონებრივ დეკლარაციებში დეპუტატმა მიუთითა სააკაშვილი, როგორც პირი, რომელთან ერთადაც ცხოვრობდა, თუმცა ისინი ოფიციალურად დაქორწინებულები არ იყვნენ. 2023 წლიდან სააკაშვილი მის დეკლარაციებში აღარ ფიგურირებს, თუმცა ინფორმაცია მათი ქალიშვილის – ჟასმინ მიხეილოვნას შესახებ შენარჩუნდა.
კანონმდებლობით, ორივე მშობელი ვალდებულია არჩინოს შვილი სრულწლოვანებამდე, მიუხედავად იმისა, იმყოფებიან თუ არა ქორწინებაში.
მოსარჩელე მხარე სააკაშვილის შემოსავლის მესამედს ითხოვს. იურისტის თქმით, სასამართლო ალიმენტს ნებისმიერ შემთხვევაში დააკისრებს, თუმცა ოდენობა შეიძლება შემცირდეს, თუ მოპასუხე მხარე მძიმე ფინანსურ მდგომარეობას, ჯანმრთელობის პრობლემებს ან სხვა კმაყოფაზე მყოფ პირებს დაამტკიცებს.
რაც შეეხება მშობლის უფლებების ჩამორთმევას, ბუზანოვის თქმით, ეს უკიდურესი ზომაა და მხოლოდ ცალკე ცხოვრება ან ალიმენტის გადაუხდელობა საკმარისი საფუძველი არ არის.
სასამართლომ უნდა დაადგინოს, არიდებს თუ არა მამა მოვალეობებს განზრახ და უმიზეზოდ თავს. თუ იასკო ვერ წარმოადგენს უტყუარ მტკიცებულებებს, რომ სააკაშვილს წლების განმავლობაში არანაირი კონტაქტი და ინტერესი არ ჰქონია შვილთან, ამ ნაწილში მოთხოვნა, სავარაუდოდ, არ დაკმაყოფილდება.
საქმეში ასევე ჩართული იქნება ბავშვთა დაცვის სამსახური, რომლის დასკვნასაც გადამწყვეტი მნიშვნელობა ენიჭება, ხოლო კანონმდებლობის ახალი ცვლილებებით, მშობლის უფლებების ჩამორთმევის პროცესში პროკურორის მონაწილეობა სავალდებულოა. ამ ეტაპზე სასამართლოს საბოლოო გადაწყვეტილება არცერთ მოთხოვნაზე არ მიუღია.