პარტიების ნაწილისთვის გაუგებარია, რომელი პოლიტიკური პარტიის მიმართ რა არის სადავო „ქართული ოცნების“ სარჩელში. მეორე დღეა ამ საკითხის დაზუსტებას ითხოვენ პარტიები და ასევე საკონსტიტუციო სასამართლოს მოსამართლე ევა გოცირიძე.
საკონსტიტუციო სასამართლოს მოსამართლემ, სერგო მეთოფიშვილმა კი ცოტა ხნის წინ სხდომაზე განაცხადა, რომ მჯისთვის პირადად გასაგებია, თუ რას ედავებიან თოთოეულ პარტიას – “რამდენად დასაბუთებულია, არ ვიცი, ეს სულ სხვა საკითხია”.
სერგო მეთოფიშვილი – ჩემთვის პირადად გასაგებია სარჩელი. ანუ სარჩელში რაიმე გაუგებარი ჩემთვის არ არის. მოთხოვნა გასაგებია, წყობა მოთხოვნის გასაგებია, თვითონ სარჩელის წყობაც გასაგებია, დასაბუთებაც გასაგებია, რომელ პარტიას რას ედავებიან – გასაგებია. რამდენად არის დასაბუთებული ეს არ ვიცი, ეგ სულ სხვა საკითხია“.
ნიკა გვარამია – „ქალბატონ ევას [გოცირიძე] უთხარით, რომლისთვისაც არ არის გასაგები“
სერგო მეთოფიშვილი – „სხვანაირად ინტერპრეტაცია ამის და სხვა კონტექსტში გადმოცემა მოხდა მარტო მხარეების მიერ არა, მედიის მიერაც. ჩემთვის უცნობია, გაუგებარი თქვენთვის რატომაა რას მედავებიან… ამ შემთხვევაში ვეთანხმები ბატონ როინიშვილს, ეს საკითხი განვლილი გვაქვს და სხვანაირად რომ ყოფილიყო, ალბათ გამწესრიგებელ სხდომაზე გვექნებოდა, სულ ცოტა, განსხვავებული მოსაზრება“.
ამ საკითხზე ისაუბრა სიტყვის გამოსვლისას გახარიას გუნდის წევრმა, ბერდია სიჭინავამაც.
“თუ თქვენ გაიგეთ ჩვენ რას გვედავებიან, ბატონო მოსამართლეებო, ამიხსენით, რას გვედავებიან ჩვენ” – თქვა სიჭინავამ.
საკონსტიტუციო სასამართლოში პოლიტიკური პარტიების აკრძალვაზე “ქართული ოცნების” სარჩელის განხილვა დღეს, 22 ოქტომბერს, 12:00 საათზე განახლდა. სასამართლო კვლავ შუამდგომლობების ეტაპზე რჩება.
საქმეს საკონსტიტუციო სასამართლოს შვიდი მოსამართლის შემადგენლობით პლენუმი იხილავს.
საკონსტიტუციო სასამართლოში წარდგენილ სარჩელს პარლამენტის 88 წევრი აწერს ხელს. მათი სარჩელის საფუძველზე სასამართლოს დღის წესრიგში შემდეგი პოლიტიკური გაერთიანებების არაკონსტიტუციურად ცნობის საკითხი დგას: – “ერთიანობა − ნაციონალური მოძრაობა“; “კოალიცია ცვლილებისთვის – გვარამია მელია გირჩი დროა“; “ძლიერი საქართველო − ლელო, ხალხისთვის, თავისუფლებისთვის!“, “ფედერალისტური პარტია“ და პარტია “გახარია საქართველოსთვის“.