პარლამენტის თვითმმართველობის კომიტეტის თავმჯდომარის ირაკლი ქადაგიშვილის განცხადებით, საფრანგეთის მიერ გარე ჩარევებთან დაკავშირებით კანონის გამკაცრება კიდევ ერთი ნათელი მაგალითია, როგორ ხდება საქართველოზე ზეწოლა.
„ეს ხდება არა დემოკრატიული პრინციპებიდან ან ქვეყნის ინტერესებიდან, არამედ სხვების ინტერესებიდან გამომდინარე. საქართველომ გარე დაფინანსებებთან, გარე ჩარევებთან, იგივე მიტინგების მართვასთან დაკავშირებით გაცილებით ჰუმანური კანონმდებლობა მიიღო, ვიდრე – სხვა ქვეყნებმა. მათ გაცილებით მძიმე და ბრუტალური კანონმდებლობა მიიღეს. მათაც დაინახეს, რომ არსებობს კონკრეტული საფრთხეები, არა მარტო სახელმწიფოს სუვერენიტეტის, არამედ დემოკრატიისა და საზოგადოების წინააღმდეგ მიმართული. საფრანგეთის შინაგან საქმეთა მინისტრმა კანონის მიღების დროს საქართველოს მაგალითი მოიყვანა. ჩვენ ვმოქმედებთ იმ სტანდარტით, რა სტანდარტითაც დემოკრატია მოქმედებს სუვერენულ სახელმწიფოში. რატომ არიან რეპუტაციაშელახული დასავლური ინსტიტუტები და რატომ არიან დასავლეთის ბევრი ქვეყნის ეროვნული მთავრობები ავტორიტეტდაკარგული საკუთარ საზოგადოებაში? იმიტომ, რომ წვრილ პოლიტიკურ ინტერესებზე პრინციპები გაიწირა. სწორედ ეს წვრილი პოლიტიკური ინტერესები იყო, რომელიც საქართველოში მათ ამოძრავებდათ და არა – დემოკრატია. ვერც მედიის თავისუფლებას ხედავდნენ, ვერც ბიზნესის თავისუფლებას, ვერც ყველა იმ რეფორმას, რომელიც არჩევნებთან დაკავშირებით ჩატარდა, რამაც საშუალება მისცა ოპოზიციას, საქართველოში ისტორიაში პირველად, რომ ყველაზე წარმატებული შედეგი მიიღო. ამიტომ, ამ შემთხვევაში მათი ინტერესი აცდენილი იყო იმ ლოზუნგებს, რა ლუზუნგებითაც ხალხს ერთგვარად თვალს უბრმავებდნენ. ამ ლუზუნგების უკან ჰქონდათ ხელისუფლებაში მოსვლის კონკრეტული მიზნები – დანიშნული მარიონეტების მოყვანის. ეს არ გამოუვიდათ“, – აღნიშნა ირაკლი ქადაგიშვილმა.
შეგახსენებთ, საფრანგეთის შინაგან საქმეთა მინისტრმა, ლორან ნუნიესმა ქვეყნის სენატის სხდომაზე სიტყვით გამოსვლისას განაცხადა: „ჩვენი დემოკრატიების დესტაბილიზაცია ვისაც სურს, არჩევნებში ჩარევა ან შედეგების შეცვლა არ სჭირდებათ, საკმარისია, საზოგადოებას დააჯერონ, რომ არჩევნები მანიპულირებული იყო“. მინისტრმა საქართველოს მაგალითი გაიხსენა: „ბოლო თვეებში ევროპის რამდენიმე ქვეყანა არჩევნების პერიოდში ინფორმაციის მასშტაბური მანიპულაციის სამიზნე გახდა. მათ შორისაა საქართველო, მოლდოვა, გერმანია და გაერთიანებული სამეფო“.