მაკრონის განცხადებები გვახსოვს, როდესაც მოძალადე ბრბოს მხარი დაუჭირა, რომელიც საქართველოს პარლამენტის დაწვას ცდილობდა. როცა სხვა ქვეყანაში ქარს დათესს, საკუთარ ქვეყანაში ქარიშხალს მიიღებ, – ამის შესახებ პარლამენტის თავმჯდომარემ, შალვა პაპუაშვილმა განაცხადა.
მისი თქმით, სახელმწიფო ინსტიტუტების დაწვის მცდელობები და სახელმწიფო ინსტიტუტებზე შტურმები საკუთარ ქვეყანაში მიიღეს.
„სამყარო ასეა მოწყობილი, საბოლოო ჯამში, ის, ვინც ბოროტებას დასთესს, საკუთარ სახლში იგივეს მიიღებს. ამავე დროს, რაც ვიხილეთ, პოლიციის ბრუტალობაა. ვნახეთ, აგრესიული და მშვიდობიანი აქცია იყო, მათ შორის აქციები, რომლებიც აგრესორებს აძლიერებდნენ, მაგრამ პოლიციის ბრუტალობა ვიხილეთ. ვნახეთ, რა არის შედეგები – ადამიანს მტევანი მოწყდა. ხელის მტევანი ბავშვს, არასრულწლოვანს მოწყდა. ბავშვს, არასრულწლოვანს თვალი ამოთხარეს. ახალგაზრდას ყბა მოტეხეს და ჩაუშალეს. ფაქტობრივად, რასაც ვხედავთ, სისხლიანი ქრონიკაა პარიზის ქუჩებიდან. მნიშვნელოვანია, ეს ძალადობა დასრულდეს. ჩვენ ისე არ ვიქცევით, როგორც ზოგიერთი ევროპული ხელისუფლება იქცევა, რომ ხალისით უყურებს ძალადობას სხვა ქვეყანაში და შემდეგ ამ ძალადობას ახალისებს. რა თქმა უნდა, ეს ძალადობა უნდა დასრულდეს, უბრალოდ, ყველა ხელისუფლებამ უნდა იცოდეს, როდესაც სხვაგან მხარს უჭერ ძალადობას, შემდეგ იგივე ძალადობას შენც შენთან მიიღებ“, – განაცხადა შალვა პაპუაშვილმა.