დიდი ბრიტანეთის მიერ სანქცირებულ ტელეკომპანია „იმედში“ წილები ხელახლა გადანაწილდა. ცვლილებების შედეგად, ტელევიზიის მფლობელი კომპანიის წილები ოთხ ფიზიკურ პირს შორის თანაბრად, 25-25 პროცენტით განაწილდა.
საჯარო რეესტრში წარდგენილი 16 ოქტომბრის დოკუმენტების მიხედვით, „ჯორჯიან მედია პროდაქშენ გრუპში“, რომლის მეშვეობითაც ტელეკომპანია „იმედს“ ფლობენ, წილები სრულად დათმეს კომპანიამ „პრაიმ მედია გლობალმა“, ვასილ კალანდარიშვილმა და ნათია სონღულაშვილმა.
ტელეკომპანიის ახალი მეწილე ტელეწამყვანი მაგდა ანიკაშვილი გახდა. 25%-მდე გაიზარდა ტელეკომპანიის გენერალური დირექტორის, მაკა ლომიძის, ტელეწამყვან ირაკლი ჩიხლაძისა და პროგრამების ხელმძღვანელის, მაია ჩიგოშვილის წილები.
ახალი განაწილება ასეთია:
მარიამ (მაკა) ლომიძე, 25%, მანამდე ფლობდა 10%-ს;
ირაკლი ჩიხლაძე, 25%, მანამდე ფლობდა 10%-ს;
მაია ჩიგოშვილი, 25%, მანამდე ფლობდა 10%-ს;
მაგდა ანიკაშვილი 25%, კომპანიის ახალი მეწილეა.
დოკუმენტების მიხედვით, წილები სიმბოლურ ფასად გაიყიდა: ნათია სონღულაშვილმა და ვასილ კალანდარიშვილმა თავიანთი 10-10%-იანი წილები 100-100 ლარად დათმეს, ხოლო „პრაიმ მედია გლობალმა“ 50%-იანი წილი 500 ლარად გაყიდა.
ცვლილებამდე „პრაიმ მედია გლობალი“ კომპანიის 50%-ს ფლობდა, დანარჩენი 50% კი ხუთ ფიზიკურ პირზე, თითოეულზე 10-10 პროცენტით, იყო გადანაწილებული.