საქართველოს აქვს გაკეთებული განაცხადი, 2027 წელს გახდეს ეუთო-ს თავმჯდომარე ქვეყანა. ერთი მხრივ, ეს შეიძლება, იყოს ამბიციური განაცხადი საქართველოს მხრიდან, მეორე მხრივ, საქართველო ათწლეულებია, ეუთო-ს მონაწილე ქვეყანაა, თუმცა არასდროს ჰქონია შესაძლებლობა, ამ რანგში წვლილი შეეტანა ამ მნიშვნელოვანი ორგანიზაციის მუშაობაში, – ამის შესახებ საგარეო საქმეთა მინისტრმა, მაკა ბოჭორიშვილმა შვეიცარიის საგარეო საქმეთა მინისტრ და ეუთო-ს თავმჯდომარე იგნაციო კასისთან გამართულ ერთობლივ პრესკონფერენციაზე განაცხადა.
მაკა ბოჭორიშვილს დაუსვეს კითხვა, რატომ არის საქართველოსთვის ეუთო-ს თავმჯდომარეობა მნიშვნელოვანი და რა მოლოდინები არსებობს.
როგორც მაკა ბოჭორიშვილმა აღნიშნა, ორგანიზაციის თავმჯდომარეობისთვის საქართველო რელევანტურია ყველა იმ გამოწვევის გათვალისწინებით, რის წინაშე დგას ქვეყანა, ასევე ყველა იმ შესაძლებლობის გათვალისწინებით, რა შესაძლებლობებიც აქვს ქვეყანას რეგიონში.
„სწორედ ეს იყო, რამაც განაპირობა ჩვენი მხრიდან განაცხადის გაკეთება და წვლილი შევიტანოთ ამ ორგანიზაციის განვითარებასა და მუშაობაში, რომელიც დაფუძნებულია დიალოგზე და კონსენსუსზე. რაც არ არის მარტივი, მით უმეტეს ამ მოცემულობაში, როდესაც უფრო მეტ დაყოფას ვხედავთ დღეს ჩვენ მსოფლიოში, ვიდრე გაერთიანებას. ჩვენ გვაქვს გარკვეული დრო, რომ ვიმუშაოთ ყველასთან და ვეძიოთ სწორედ ის შესაძლებლობები, რომ გარკვეული თანხმობა, კონსენსუსი შედგეს ეუთო-ს მომავალ თავმჯდომარეობაზე. ჩვენ, რა თქმა უნდა, ვიმუშავებთ თავმჯდომარეობასთან ერთად, ეს არის მათი საქმიანობის დიდი და მნიშვნელოვანი ნაწილი. ამ პროცესში საქართველო კონსტრუქციულად იქნება ჩართული, რომ ორგანიზაციის შემდგომი მუშაობის გაძლიერებაში შეიტანოს წვლილი, როგორც მონაწილე ქვეყანამ“, – განაცხადა მაკა ბოჭორიშვილმა.