უფლებები საქართველოს ინფორმაციით, ირანელი აქტივისტი მოჰამმად მაჰდი რაჰიმიანი სასამართლომ პატიმრობაში დატოვა.
მათი ცნობით, სასამართლომ არ გაითვალისწინა რაჰიმიანისა და მისი ოჯახის ინდივიდუალური გარემოებები და დააკმაყოფილა მიგრაციის დეპარტამენტის შუამდგომლობა გაძევების პროცედურის დასრულებამდე მის დროებითი განთავსების ცენტრში მოთავსებაზე.
ორგანიზაცია აგრეთვე აცხადებს, რომ ირანში რაჰიმიანის სიცოცხლესა და ჯანმრთელობას საფრთხე ემუქრება და მოუწოდებს შესაბამის უწყებებს, იმოქმედონ არგაძევების პრინციპის შესაბამისად.
“რაჰიმიანის არასრულწლოვანი შვილების ინტერესები სასამართლომ არ გაითვალისწინა. დღეს, 2026 წლის 15 ოქტომბერს, მოსამართლე ივანე აღნიაშვილმა განიხილა შსს-ს მიგრაციის დეპარტამენტის შუამდგომლობა ირანელი აქტივისტის, მოჰამმად მაჰდი რაჰიმიანის მიგრაციის დეპარტამენტის დროებითი განთავსების ცენტრში მოთავსებასთან დაკავშირებით.
“უფლებები საქართველოს” იურისტები მიიჩნევენ, რომ მიგრაციის დეპარტამენტის მიერ წარდგენილი შუამდგომლობა დაუსაბუთებელი იყო. მხედველობაში არ ყოფილა მიღებული ის ფაქტები, რომ რაჰიმიანის ოჯახი დაფუძნებულია საქართველოში, მათ მუდმივი საცხოვრებელი ადგილი აქვთ და რაჰიმიანის შვილები სწავლას ქართულ სკოლაში აგრძელებენ.
სამწუხაროდ, სასამართლომ არ გაითვალისწინა რაჰიმიანისა და მისი ოჯახის ინდივიდუალური გარემოებები და დააკმაყოფილა მიგრაციის დეპარტამენტის შუამდგომლობა გაძევების პროცედურის დასრულებამდე რაჰიმიანის დროებითი განთავსების ცენტრში მოთავსებაზე.
“უფლებები საქართველო” კიდევ ერთხელ შეახსენებს სახელმწიფო ორგანოებს, რომ რაჰიმიანის სიცოცხლესა და ჯანმრთელობას მოქალაქეობის ქვეყანაში მყისიერი და რეალური საფრთხე ემუქრება და მოუწოდებს, იმოქმედონ არგაძევების პრინციპის შესაბამისად.” – ნათქვამია განცხადებაში.
“უფლებები საქართველოს” იურისტები სასამართლოს აღნიშნულ გადაწყვეტილებას გაასაჩივრებენ.