სტამბოლში წყალდიდობას 14 წლის მოზარდი ემსხვერპლა.
ინფორმაციას თურქული ინგლისურენოვანი გამოცემა Daily Sabah ავრცელებს. მათი ცნობით, ფათიჰის რაიონის ბალათის უბანში, წყალდიდობის დროს, დენის დარტყმისგან 14 წლის მოზარდი დაიღუპა. იგი უგონო მდგომარეობაში გადაიყვანეს საავადმყოფოში, თუმცა, ექიმების მცდელობის მიუხედავად, მისი გადარჩენა ვერ მოხერხდა. ხელისუფლებამ მომხდარზე გამოძიება უკვე დაიწყო.სტიქიამ ქალაქში წყალდიდობის 1 277 შემთხვევა და 15 მეწყრული პროცესი გამოიწვია, ხოლო სატრანსპორტო მოძრაობა თითქმის სრულად პარალიზდა. გარდა ამისა, სტიქიამ დააზიანა 808 საცხოვრებელი სახლი, 280 ბიზნესობიექტი და 76 ავტომობილი.
იმის გამო, რომ უხვი ნალექი ქალაქის ნაწილს კვლავ საფრთხეს უქმნიდა, ხელისუფლებამ ხუთშაბათს სტამბოლის მასშტაბით სასწავლო პროცესი შეაჩერა. სტამბოლის გუბერნატორმა დავუთ გიულმა მოსახლეობას, განსაკუთრებით ქალაქის აზიურ ნაწილში მცხოვრებლებს, სიფრთხილისკენ მოუწოდა.