მუსიკოსი და პოლიტიკოსი, ჯგუფ “ვაკის პარკის“ სოლისტი ზაზა ხუციშვილი “პრაიმტაიმს” ტრაგიკულად დაღუპული მამუკა ონაშვილის შესახებ ესაუბრა მათი მეგობრული და პროფესიული თანამშრომლობის დეტალებზე.
როგორც ინტერვიუს დროს ზაზა ხუციშვილმა აღნიშნა, არის რაღაც, რაც არასდროს გაუმხელია და ამ თემაზე პირველად საუბრობს.
“პროექტში “საუკუნის ნოსტალგია“ პირველად გადაიღეს “უკარება“ (აფრიკ სიმონის – Hafanana) და მეორე “ის სხვა“ (ჯო დასენის – A toi), ასევე “ფოთოლცვენა“ (კომპოზიტორი ნ. ერგემლიძე)… სხვათა შორის, მამუკასთან, კიდევ ერთი გამონაკლისი გავაკეთე, როცა ეს პროექტი დასრულდა, დამირეკა და მთხოვა, ერთ-ერთი სიმღერის ტექსტი დამეწერა. მანამდე, ერთმა პიროვნებამ მთხოვა, მაგრამ გადატვირთული რეჟიმის გამო, უარი ვუთხარი. მამუკა ისეთი კაცი იყო, ვერ დავწყვიტე გული და დავთანხმდი. ეს იყო ადრიანო ჩელენტანოს – „L’arcobaleno“, რომელიც ასევე შესანიშნავად შეასრულა. არასდროს მითქვამს და მამუკასაც ვთხოვე, არსად გაემხილა, რომ ჩემი ტექსტია, პირველად ვამბობ თქვენთან”, – აღნიშნავს ზაზა ხუციშვილი.
შეგახსენებთ, 55 წლის მამუკა ონაშვილი 30 ივლისს ნატახტართან მომხდარ ავარიას ემსხვერპლა.