ქალთა საფეხბურთო კლუბი ნიკე-ლუსო განცხადებას ავრცელებს.
“2026 წლის 29 სექტემბერს, ქალთა საფეხბურთო კლუბ ,,ლანჩხუთის’’ სოციალურ გვერდზე განთავსებული განცხადებით, საზოგადოებას მიეწოდა არასწორი და მორიგი ცრუ ინფორმაცია.
განცხადებაში მითითებულია, რომ საფეხბურთო კლუბი ,,ნიკე-ლუსო’’ გასახდელში დამონტაჟებული ვიდეო კამერებით იწერდა ფეხბურთელებს. ამავე დროს, საზოგადოებას დამატებით მიეწოდა მორიგი არასწორი ინფორმაცია, რომ სახელმწიფო აუდიტის სამსახურის მიერ, საფეხბურთო კლუბი ,,ნიკე-ლუსო’’ დაჯარიმდა გასახდელში ვიდეო მონიტორინგის განხორციელების ფაქტზე.
გვსურს საზოგადოებას კიდევ ერთხელ მივაწოდოთ ინფორმაცია, რომ საფეხბურთო კლუბ ,,ნიკე-ლუსოს’’ ოფისის ტერიტორიაზე საერთოდ არ არის განთავსებული გასახდელი ოთახი. გაცნობებთ, რომ ,,ნიკე-ლუსოს’’ ფეხბურთელები ვარჯიშობენ და თამაშობენ საქართველოს ფეხბურთის ფედერაციის მიერ გამოყოფილ ბაზაზე.
აღნიშნული საფეხბურთო ბაზა მდებარეობს სხვა ლოკაციაზე და მას არ აქვს რაიმე კავშირი ,,ნიკე-ლუსოს’’ სამუშაო ოფისთან, შესაბამისად ოფისში არ არის განთავსებული გასახდელი ოთახი.
სახელმწიფო აუდიტის 2026 წლის 27 აპრილის N გ-1/028-1/2026 გადაწყვეტილებაში ვკითხულობთ ,,ვიდეო მონიტორინგი მიმდინარეობს შენობის მეორე სართულზე მდებარე საკონფერენციო ოთახსა და ინვენტარის შესანახი ოთახის მხოლოდ შიდა პერიმეტრზე. ამასთან ხსენებული ოთახები არ წარმოადგენს გამოსაცვლელ სივრცეებს’’. ამავე გადაწყვეტილების თანახმად ,,ნიკე-ლუსოს’’ ოფისის სხვა ოთახებში, რომლითაც სარგებლობენ ფეხბურთელები და სამწვრთნელო შტაბი, არ ხორციელდება ვიდეო მონიტორინგი.
კიდევ ერთხელ ხაზგასმით გვსურს აღვნიშნოთ, რომ სახელმწიფო აუდიტის სამსახურს ,,ნიკე-ლუსო’’ არ დაუჯარიმებია გასახდელში ვიდეო მონიტორინგის განხორციელების ფაქტზე. გთხოვთ, თავი შეიკავეთ დაუსაბუთებელი და არასწორი ინფორმაციის გავრცელებისაგან. ამავე დროს, დაინტერესებულ პირებს მოვუწოდებთ გაეცნონ სახელმწიფო აუდიტის 2026 წლის 27 აპრილის N გ-1/028-1/2026 გადაწყვეტილებას” – ნათქვამია განცხადებაში.