6 თვე გავიდა მას შემდეგ, რაც ქარელის #2 საჯარო სკოლაში სწავლა შეწყდა. მიზეზად შენობის ავარიულობა დასახელდა.
600-მდე მოსწავლეს ურჩიეს, რომ პირველ სკოლაში გადასულიყვნენ. დღეს მშობლები ხელმოწერებს აგროვებენ, რომ სკოლას ხელახალი ექსპერტიზა ჩაუტარდეს. განცხადების შინაარსი ,,ქართლის ამბებს” გააცნეს.
მოთხოვნები რამდენიმე პუნქტისგან შედგება:
1. ზამთრის პერიოდში საგაკვეთილო პროცესი უწევს საღამოს საათებში (სიბნელეში), რაც უარყოფითად მოქმედებს მოსწავლეთა შრომისუნარიანობასა და სწავლის ეფექტურობაზე, მოსწავლეს უქვეითდება სწავლის ხარისხი.
2. ქალაქში საზოგადოებრივი ტრანსპორტის არარსებობის გამო, მოსწავლეთა უმეტესობას ფეხით გადაადგილდება, რაც საღამოს საათებში მათ უსაფრთხოებას სერიოზულ საფრთხეს უქმნის.
3. დასაქმებული მშობლების უმრავლესობა დილის საათებში ვერ ახერხებს მოსწავლეთა მომზადების პროცესში ჩართვასა და მეთვალყურეობას, რაც ზრდის აკადემიური მოსწრების გაუარესების რისკს.
4. გვიანი გრაფიკის გამო მოსწავლეები ვეღარ ახერხებენ დამატებით წრეებსა და სპორტულ/შემოქმედებით აქტივობებში მონაწილეობას, ვერ იღებენ არაფორმალურ განათლებას, რაც აუცილებელია მათი ფიზიკური და მენტალური განვითარებისთვის.
5. არსებული ვითარებიდან გამომდინარე ათეულობით მშობელმა უკვე გადაიყვანა მოსწავლე ქალაქის სხვა სკოლაში, რაც მათთვის დამატებით სტრესულ გარემოს ქმნის. ასევე, მოსწავლეების გადინების გამო საფრთხე ექმნება ისტორიული სკოლის ერთიანობისა და მთლიანობის საკითხს.
„მშობლებისათვის ამ დრომდე უცნობია ქარელის #2 საჯარო სკოლის შენობის რეაბილიტაციის/რეკონსტრუქციის კონკრეტული ვადები და სამოქმედო გეგმა. გაურკვევლობა იწვევს დიდ უკმაყოფილებასა რადგან დროებით ფართში მეორე ცვლაში სწავლება ვერ უზრუნველყოფს მოსწავლეთათვის სრულფასოვან სასწავლო გარემოს.
მიგვაჩნია, რომ პრობლემის ერთადერთი ფუნდამენტური გამოსავალი სწორედ მშობლიურ სკოლაში დროული დაბრუნებაა“.
„ვიმედოვნებთ, რომ გათვალისწინებული იქნება ჩვენი მდგომარეობა და მოხდება დროული რეაგირება, წინააღმდეგ შემთხვევაში იძულებულები ვიქნებით მივმართოთ პროტესტის უკიდურეს ზომებს“.- წერია მიმართვაში.