„სისტემა არ მუშაობს და სახელმწიფო სტრუქტურები ჩამოშლილია“ – ასე აფასებს კორუფციის მკვლევარი ბესიკ დონაძე რთველის პროცესში შექმნილ ვითარებას. მისი თქმით, მოსავლის მართვის კომპანიამ რთველისთვის საჭირო თანხა წინასწარ ვერ გათვალა, დამატებით 50 მილიონი ლარის გამოყოფა კი ხელისუფლებას მხოლოდ მევენახეების პროტესტის შემდეგ მოუწია.
დონაძე მიიჩნევს, რომ ეს სახელმწიფო სტრუქტურებში დაგეგმვისა და პასუხისმგებლობის პრობლემაზე მიუთითებს.
როგორც ყველა სახელმწიფო სტრუქტურა, ასევე არის მოსავლის მართვის კომპანია, რომელმაც ვერ გათვალა რთველის უზრუნველსაყოფად საჭირო თანხა. დაახლოებით 4-ის 15 წუთზე მოუწიათ 50 მლნ ლარის გამოყოფა. ეს 50 მლნ ლარი გამოყვეს იმიტომ, რომ იძულებული გახდნენ, რადგან დაინახეს პროტესტი. ყველაფერი სახელმწიფოში აგებული არის მათი რეიტინგის დასაცავად და საწიროებები არ არის თავის დროზე წინასწარ გათვლილი. სამწუხაროდ, ეს იმას ნიშნავს, რომ სისტემა არ მუშაობს, ეს იმას ნიშნავს, რომ სახელმწიფო სტრუქტურები არის ჩამოშლილი, ეს იმას ნიშნავს, რომ სახერლმწიფო სტრუქტურებში არ არსებობს პასუხისმგებელი პირი, რომელიც ამ ყველაფერზე აიღებს პასუხისმგებლობას როგორც პოლიტიკურს, ასევე სამართლებრივს და ასე გაგრძელდება იქამდე, სანამ “ქართული ოცნება” იქნება ხელისუფლებაში, – ამბობს კორუფციის მკვლევარი ბესიკ დონაძე.
დიდი პროტესტის შემდეგ ახალსოფელში ყურძნის ჩაბარების პირობები შეიცვალა. ღვინის ქარხანამ, სადაც მევენახეები მოსავლის ჩაბარებას ორი დღის განმავლობაში ელოდებოდნენ, ყურძნის მიღება დაიწყო.
გადაწყვეტილებას წინ უძღოდა მევენახეების პროტესტი, გზის გადაკეტვა და ადგილზე დაპირისპირება. ვითარების გამწვავების შემდეგ ახალსოფელში კახეთის გუბერნატორიც მივიდა.
ამ დროისთვის ადგილზე კვლავ რჩებიან მევენახეები, რომელთა ნაწილს ყურძენი მანქანებში გუშინ დილიდან აქვს დატვირთული. ისინი ელოდებიან, ჩაიბარებს თუ არა ქარხანა დარჩენილ მოსავალსაც იმავე პირობებით, რომლითაც ყურძნის მიღება ცოტა ხნის წინ განახლდა.