კორონავირუსით გარდაცვლილი 20 წლის ფეხბურთელის მამამ, გაიოზ ჩარკვიანმა საქართველოს პროკურატურასთან უწყვეტი აქცია დააანონსა – ის გენერალურ პროკურორთან, გიორგი გვარაკიძესთან შეხვედრას ითხოვს.
კორონავირუსით გარდაცვლილი ახალგაზრდის ოჯახის წევრები და ახლობლები ამ წუთებში პროკურატურასთან, აქციას მართავენ.
ვახტანგ ჩარკვიანის მამამ, გაიოზ ჩარკვიანმა განაცხადა, რომ ის სამართლიანობის აღდგენას ითხოვს.
„5 წელზე მეტია, რაც რესპუბლიკურ საავადმყოფოში ჯალათმა ექიმებმა ჩემი 20 წლის შვილი შეიწირეს. არაერთხელ მოვითხოვეთ საქმის ეფექტურად გამოძიება, თუმცა ყურად არ იღეს. საქმეში არის უამრავი მტკიცებულება. ამ 5 წლის მანძილზე, მე და ჩემმა კოლეგა მეგობრებმა, ადვოკატებმა ყველა მტკიცებულება მივიტანეთ, მაგრამ დღემდე პასუხი არაა. სასაცილოდაც მიგდებენ. აქ მე ვარ მეუღლესთან ერთად და ვითხოვ სამართალს, სამართლიანობის აღდგენას.
მე მინდა მთავარ პროკურორს, გიორგი გვარაკიძეს მივმართო – ბატონო გიორგი, 2 შვილის პატრონი ხარ, მამა ხარ, ჩამოდი და თვალებში ჩავხედოთ ერთმანეთს. აქ ვიქნებით მე და ჩემი კოლეგები, სანამ არ ჩამოხვალ. გაგვეცი ოჯახს პასუხი 5 წლის განმავლობაში რომ მატყუებ. ამ მომენტიდან ვჯდები აქ და ვმართავ უწყვეტ აქციას,“ – განაცხადა გაიოზ ჩარკვიანმა.
ცნობისთვის, 20 წლის ფეხბურთელი ვახტანგ ჩარკვიანი 2021 წლის 10 სექტემბერს, რესპუბლიკურ საავადმყოფოში გარდაიცვალა. მას კორონავირუსი ჰქონდა. ოჯახი ჩარკვიანის გარდაცვალებაში მედიკოსებს ადანაშაულებს.