თუ ეს ვიზიტი ჩაივლის ისე, რომ შალვა პაპუაშვილს არ ექნება არცერთი შეხვედრა ევროკავშირის ინსტიტუტებში, ნათელი გახდება თუ რაოდენ იზოლაციაშია დღეს მოქცეული ბიძინა ივანიშვილის პოლიტიკის შედეგად ჩვენი ქვეყანა, – ასე გამოეხმაურა „ლელო-ძლიერი საქართველოს“ ერთ-ერთი ლიდერი, სალომე სამადაშვილმა პარლამენტის თავმჯდომარის, შალვა პაპუაშვილის ბრიუსელში ვიზიტს.
როგორც მან აღნიშნა, „არანაირი პოლიტიკური ურთიერთობები ევროკავშირსა და საქართველოს შორის აღარ არსებობს“.
„ამ ეტაპზე, ცხადია, არ ვიცი, ზუსტად რა პროგრამა აქვს პაპუაშვილს ბრიუსელში, მაგრამ თუ ეს ვიზიტი ჩაივლის ისე, რომ მას არ ექნება არცერთი შეხვედრა ევროკავშირის ინსტიტუტებში, ვფიქრობ, რომ საზოგადოებისთვის კიდევ ერთხელ და ძალიან ნათელი გახდება თუ რაოდენ იზოლაციაშია დღეს მოქცეული ბიძინა ივანიშვილის პოლიტიკის შედეგად, ჩვენი ქვეყანა. ევროკავშირში გაწევრიანების დღის წესრიგი არის გაუქმებული, საქართველო, ფაქტობრივად, მხოლოდ ფორმალურად ითვლება კანდიდატ ქვეყნად და არანაირი პოლიტიკური ურთიერთობები რეალურად ევროკავშირსა და საქართველოს შორის დღეს აღარ არსებობს, სწორედ ბიძინა ივანიშვილის პოლიტიკის დამსახურებით. დაველოდოთ ვიზიტის შედეგებს და ვნახოთ შეხვდება თუ არა საერთოდ ვინმე ბრიუსელში ევროკავშირის ინსტიტუციებიდან პაპუაშვილს”, – განაცხადა სალომე სამადაშვილმა.
ცნობისთვის, საქართველოს პარლამენტის თავმჯდომარე შალვა პაპუაშვილი, დელეგაციასთან ერთად, ბელგიის სამეფოს დედაქალაქ ბრიუსელში გაემგზავრა. ვიზიტის ფარგლებში, პარლამენტის თავმჯდომარე შეხვედრებს გამართავს ბელგიის ფედერალური პარლამენტის სენატისა და წარმომადგენელთა პალატის პრეზიდენტებთან.