თბილისის საბავშვო ბაღებში ბავშვების ინტოქსიკაციის შემდეგ გამოძიება ახლა იმის დადგენას ცდილობს, რომელი საკვები პროდუქტი გახდა მოწამვლის მიზეზი და ვის მიერ იყო ის მიწოდებული. მომწოდებელი კომპანიების საწყობები დალუქულია, აღებულია პროდუქციის სინჯები, კომპანიების წარმომადგენლები კი გამოკითხვაზე დაიბარეს.
დიახ (გამოკითხვაზე ვიყავი), სურსათ-უვნებლობა იყო და აიღეს სინჯი. ბურღულეული და ხილბოსტნეული შეგვაქვს. ნამდვილად დალუქეს და ნამდვილად წაიღეს. ხელი მომაწერინეს, რომ ნამდვილად ჩატარდა კვლევები, – ამბობს ნანული სიფრაშვილი.
კომპანიის წარმომადგენელი გამორიცხავს, რომ ბავშვები მათ მიერ მიწოდებული საკვებით მოწამლულიყვნენ.
შპს “ინ”, შპს “რიო”, თელეთის მეფრინველეობის ფაბრიკა, შპს “ფუდსერვისი”, შპს “ორნი” და შპს “კვება” – ამ კომპანიებს აქვთ განაწილებული ბაგა-ბაღების მომარაგება. სწორედ ამ კომპანიების მიერ მიწოდებულ საკვებს უნდა ჩაუტარდეს ახლა ექსპერტიზა.
საკვების შესყიდვაზე ტენდერები თბილისის მერიას არ გამოუცხადებია – ბაღებისთვის პროდუქციის შესყიდვა კონსოლიდირებული ტენდერებით ხორციელდება. 2026 წლის ივნისიდან ამ ფუნქციას მთავრობის მიერ შექმნილი ცენტრალური შემსყიდველი ორგანო ასრულებს. ოფიციალურ შესყიდვების სისტემაშიც თბილისის ბაგა-ბაღებისთვის საკვები პროდუქტების ტენდერები სწორედ ცენტრალური შემსყიდველი ორგანოს სახელითაა გამოცხადებული.
შესაბამისად, მომხდართან დაკავშირებით კითხვები მხოლოდ თბილისის მერიისა და კახა კალაძის პასუხისმგებლობაზე არ ჩნდება. ყურადღების ცენტრშია როგორც მომწოდებლების შერჩევის პროცესი, ისე თბილისის ბაგა-ბაღების მართვის სააგენტოს მხრიდან საკვების ხარისხისა და უსაფრთხოების კონტროლი.
კვებაზე, რომელიც ასეულობით ლარი იხარჯება, იმდენად უხარისხოდ განხორციელდა, რომ სამწუხაროდ, ბავშვების ჯანმრთელობას შეექმნა პრობლემები და აქ არის ძალიან საინტერესო დეტალი, როგორც ჩანს, სახელმწიფოს იმდენად კორუმპირებულად მიაჩნია კალაძის მერია და ეს უწყება მთლიანად, რომ დიდი ხანია თბილისის მერია თავად აღარ ახორციელებს საკვები პროდუქტების შეძენას განსხვავებით სხვა მუნიციპალიტეტებისგან და ამას სახელმწიფო შესყიდვების სააგენტო და ცენტრალური შემსყიდველი ორგანო ახორციელებს. ამ კონტრაქტების შესრულების კონტროლი უკვე კალაძის უწყების პასუხისმგებლობაა ანუ იმაზე, რომ დღეს ბავშვების ჯანმრთელობა დადგა რისკის ქვეშ, პასუხისმგებელია, რა თქმა უნდა, კალაძის უწყება, პასუხისმგებელია, მათ შორის, ცენტრალური სახელმწიფო უწყებები. რამდენიც ეპატიათ როგორც სისხლის სამართლებრივად, ისე პოლიტიკური თვალსაზრისით, ისე უარესს აკეთებენ ეს ადამიანები, – ამბობს ირაკლი აბესაძე.