ილია თოფურიას მიერ სოციალურ ქსელ X-ზე გაკეთებულმა განცხადებამ, რომელშიც ქართველი მებრძოლი ჯასტინ გეიჯის ხელთათმანების შემოწმებაზე საუბრობს, უცხოურ MMA მედიაში გამოხმაურება გამოიწვია. თოფურიას პოსტს მალევე თავად გეიჯიც გამოეხმაურა.
როგორც გამოცემა MMA Sucka წერს, თოფურიას განცხადების გავრცელებიდან მალევე UFC-ის მსუბუქი წონის ჩემპიონმა ქართველ მებრძოლს უპასუხა.
“94 დღე და საუკეთესო, რაც მოიფიქრე, ეს სუსტი გამართლებაა. ისეთივე ცუდია, როგორიც შენი ბოლო გამოსვლა. უკეთესად შეგიძლია, ბიჭო“, – დაწერა გეიჯმა.
ამ პასუხით ამერიკელმა მებრძოლმა თოფურიას მინიშნება, თითქოს მისი ხელთათმანების შემოწმება მომავალში აუცილებელი იქნება, ფაქტობრივად, თავის მართლებად შეაფასა.
თოფურიამ თავდაპირველ პოსტში დაწერა: „შემდეგ ჯერზე დავრწმუნდები, რომ ჯასტინის ხელთათმანებს შეამოწმებენ, შიგნით რაიმე უცნაური რომ არ ჩადოს“.
MMA Sucka-ს ინფორმაციით, სწორედ ამ ფრაზამ მიიპყრო განსაკუთრებული ყურადღება. გამოცემა წერს, რომ თოფურია გეიჯს ხელთათმანების შესაძლო მანიპულაციაში ადანაშაულებს, თუმცა ამასთან დაკავშირებით რაიმე დარღვევა ოფიციალურად დადასტურებული არ არის.
თემას სხვა მებრძოლებიც გამოეხმაურნენ. გამოცემა Sherdog წერს, რომ თოფურიას განცხადებაზე კომენტარი გააკეთა UFC-ის კიდევ ერთმა ცნობილმა მებრძოლმა, არმან ცარუკიანმა.
ცარუკიანმა თოფურიას ბრალდება გააკრიტიკა და მისი განცხადება „უბრალოდ გამართლებად“ შეაფასა.
თოფურიასა და გეიჯს შორის დაპირისპირება მას შემდეგ გამწვავდა, რაც ამერიკელმა მებრძოლმა ქართველს მძიმე ბრძოლაში მოუგო. მათი შეხვედრის შემდეგ თოფურიას ჯანმრთელობის მდგომარეობა დამატებით სამედიცინო ჩარევას საჭიროებდა.
ახლა კი, მას შემდეგ, რაც თოფურიამ საბოლოო სამედიცინო შემოწმების გავლა და სპორტში დაბრუნება დაადასტურა, მათ შორის სიტყვიერი დაპირისპირებაც განახლდა. ჯერჯერობით უცნობია, შეხვდებიან თუ არა ისინი რევანშში. თუმცა თოფურიას გუნდი, როგორც უკვე გავრცელებული ინფორმაციით ირკვევა, გეიჯთან განმეორებით ბრძოლას კვლავ განიხილავს.
ამასთან, მნიშვნელოვანია, რომ გეიჯის ხელთათმანებში რაიმე აკრძალული ნივთის არსებობის შესახებ დადასტურებული ინფორმაცია არ არსებობს. ეს არის თოფურიას მიერ გაკეთებული მინიშნება, რომელსაც გეიჯმა „სუსტი გამართლება“ უწოდა.