თბილისის მე-14 საჯარო სკოლის მოსწავლეებისთვის ახალი სემესტრი ისევ უცნაურად დაიწყო. ყვავილებით დამრიგებლებთან შესახვედრად მისული ბავშვები სკოლის ნანგრევებთან შეიკრიბნენ და სამარშრუტო ტაქსებით თემქაზე მდებარე სასწავლო დაწესებულებაში წაიყვანეს.
მშობლების თქმით, მათ განათლების სამინისტრო ახალ სასწავლო წელს ალტერნატიულ ფართს სთავაზობდა, თუმცა მათი დაპირება სიცრუე აღმოჩნდა. გარდა ამისა, გაკვეთილებს მოაკლდათ დრო, რაც მათი თქმით არასრულფასოვან სასწავლო პროცესს ქმნის.
მე-14 საჯარო სკოლის მშობლები უკვე მე-5 წელია დახმარებას ითხოვენ, თუმცა არც ახალი სკოლის მშენებლობა დაწყებულა და ალტერნატიულ სივრცეებში მოსწავლეებისთვის ადგილები ვერც პირველ სმენაში გამოინახა.
თბილისის მე-14 საჯარო სკოლის მოსწავლეების ოჯახის წევრები “ტვ პირველთან” ამბობენ, რომ სკოლაში, რომელც ალტერნატივად შესთავაზეს ბავშვებს ანტისანიტარიაა.
“არის სრული ანტისანიტარია, ჩვენ მომარაგებულები ვართ, რომ მათ გავატანოთ ტუალეტის ქაღალდიდან დაწყებული სველი სალფეტკით დამთავრებული და საკვები, რაც არ გაგვაჩნია” -ამბობს ერთ-ერთი მოსწავლის მშობელი.
ამის პარალელურად დღეს “ლელო-ძლიერი საქართველოს” წევრმა ნიკა ჩერქეზიშვილმა საგანგებო ბრიფინგი გამართა, სადაც ითქვა, რომ ახალ სასწავლო წელს თბილისის 284 სკოლიდან საკუთარ შენობაში 38 საჯარო სკოლა ვერ იწყებს.