„თუ ამერიკელი პარტნიორები შეძლებენ რუსეთის შეჩერებას, უკრაინა გადადგამს ნაბიჯებს დეესკალაციისკენ“ – ასე პასუხობს ვოლოდიმირ ზელენსკი დონალდ ტრამპის განცხადებას .
ამერიკის პრეზიდენტის წინადადებას ენერგო-ობიექტებზე იერიშების შეჩერების შესახებ, ზელენსკიმ ვიდეო მიმართვით უპასუხა.
„საჭიროა მშვიდობის უზრუნველყოფა გრძელვადიან პერსპექტივაში და არა მხოლოდ არჩევნებისთვის“ – ამბობს ზელენსკი.
„ჩვენ ვხედავთ, რომ რუსები გრძნობენ ზეწოლას რუსეთის სამხედრო ეკონომიკაზე ჩვენი ზუსტი დარტყმების გამო. ჯერჯერობით არავის უნახავს ომის დასრულების რეალური მზაობა რუსეთის მხრიდან. თუმცა, თუ ჩვენს ამერიკელ პარტნიორებს შეუძლიათ, უზრუნველყონ რუსეთის გულწრფელი მზადყოფნა, რომ დასრულდეს ეს ომი, რომელიც სიცოცხლის განადგურებისკენაა მიმართული, და ეს გაკეთდეს გულწრფელად და გრძელვადიან პერსპექტივაში, უკრაინაც გადადგამს ნაბიჯებს დეესკალაციისკენ. მშვიდობა აუცილებელია. ენერგეტიკული ინფრასტრუქტურა, სურსათის მიწოდების მარშრუტები და კრიტიკული ინფრასტრუქტურა – ეს ყველაფერი უნდა გახდეს დარტყმების შეწყვეტის შესახებ ნებისმიერი დისკუსიის ნაწილი. საჭიროა მტკიცე და სამართლიანი გადაწყვეტილება, რომელიც არ იქნება გათვლილი მხოლოდ არჩევნებზე, არამედ იმოქმედებს მთელი პერიოდის განმავლობაში. ჩვენი პარტნიორებისგან კონკრეტულ წინადადებებს ველოდებით“, – განაცხადა ვოლოდიმირ ზელენსკიმ.
რამდენიმე საათის წინ, დონალდ ტრამპმა ირლანდიიდან აშშ-ში დაბრუნებისას, თვითმფრინავის ბორტზე ჟურნალისტებს განუცხადა, რომ ზელენსკის თხოვა, რუსეთში ნავთობგადამამუშავებელ ქარხნებს არ დაარტყას.
ტრამპის თქმით, მისი შეშფოთების მიზეზი დიზელის საწვავზე ფასების მნიშვნელოვანი ზრდაა, რასაც ის რუსულ საწარმოებზე უკრაინის თავდასხმებსაც უკავშირებს.