2001 წლის 11 სექტემბერს აშშ-ში მომხდარმა ტერაქტმა მსოფლიო შეცვალა. „ალ-ქაიდას“ წევრების მიერ განხორციელებულ თავდასხმებს ათასობით ადამიანის სიცოცხლე შეეწირა. მათ შორის იყო თბილისელი საშა ლიგინი, რომელიც ნიუ-იორკის მსოფლიო სავაჭრო ცენტრში, საკუთარ ოფისში იმყოფებოდა.
საშა 1973 წლის 16 იანვარს თბილისში დაიბადა. 2001 წლის დასაწყისში მას Microsoft-სა და Cantor Fitzgerald-ში მუშაობა შესთავაზეს. მან არჩევანი Cantor Fitzgerald-ზე შეაჩერა და კომპანიის პროგრამისტი გახდა. რამდენიმე თვეში კი ტერაქტის მსხვერპლი აღმოჩნდა.
საშას დედამ, ვალენტინა ლიგინმა, შვილი დნმ-ის ანალიზით ამოიცნო. ოჯახი მას სამი თვის განმავლობაში ეძებდა. ამ მძიმე პერიოდში საშას მამა გარდაიცვალა, დედა კი შვილის დაკარგვას დღემდე ვერ ეგუება.
„ტერაქტის შემდეგ ყველა გავიქეცით საავადმყოფოში, საგანგებო პუნქტში, ცენტრში. ჩვენ ვცდილობდით მის პოვნას… 3 თვის შემდეგ მამამისი გარდაიცვალა. მას აღარ სურდა ცხოვრება. ჩვენ გვყავდა მისი ძაღლიც, რომელიც სულ ტიროდა და ისიც მოკვდა… თუ გეტყვით, რომ ახლაც შვილს ველოდები, დამიჯერებთ?“, – ჰყვება საშას დედა, ვალენტინა ლიგინი ერთ-ერთ ინტერვიუში.
საშა ლიტერატურითა და ფოტოგრაფიით იყო გატაცებული. წერდა მოთხრობებსა და ლექსებს, ხოლო ნიუ-იორკში გადასვლის შემდეგ პროფესიონალი ფოტოგრაფის ლიცენზიაც მიიღო. 2000 წელს მეგობართან ერთად საკუთარი ფირმა გახსნა, სადაც შვიდკაციან გუნდს ხელმძღვანელობდა.
მას 2001 წლის 20 ოქტომბერს ქორწილი უნდა ჰქონოდა. საშა ლიგინი ნიუ-იორკშია დაკრძალული.