ქუთაისში, “თანამედროვე სამედიცინო ტექნოლოგიების დასავლეთის რეგიონალურ ცენტრში“ მომხდართან დაკავშირებით, მოქალაქე განცხადებას ავრცელებს.
“კლინიკებში ადამიანის ჯანმრთელობა და სიცოცხლე არის თუ არა დაცული, როცა შეგყავს გულის უკმარისობით პაციენტი და იქიდან უშვებენ შშმ პირს.
ოჯახს არც გეუბნებიან, რომ პაციენტი დავარდა და მენჯის ძვალი მოიტეხა. ასევე თავიც გატეხილი აქვს 77 წლის მამას, რომელიც გულის უკმარისობით მოვათავსეთ ქუთაისში “თანამედროვე სამედიცინო ტექნოლოგიების დასავლეთის რეგიონალურ ცენტრში“ და 31 აგვისტოს სახლში ასეთ მდგომარეობაში გამოგვატანეს.
კაცი, რომელიც მიუხედავად გულის ქრონიკული დაავადებისა გადაადგილდებოდა დამოუკიდებლად, თავად იცავდა ჰიგიენას, იკვებებოდა დამოუკიდებლად, მაგრამ კლინიკაში სულ რაღაც 4 დღიანი “მკურნალობის” შემდეგ სახლში მოვიყვანეთ შშმ პირი. მენჯის ძვლის მოტეხილობით და მძიმე ფსიქოემოციური ფონით. კაცი, რომელიც შვილებსაც ვეღარ გვცნობს.
არანაირი თანაგრძნობა მედპერსონალის მხრიდან. არანაირი ვალდებულების აღება პაციენტისთვის საჭირო სამედიცინო ინვენტარზე ან ჰიგიენურ საშუალებებზე, ექთნის საჭიროებაზე. გარდა იმისა, რომ წაიყვანეს მეორე დღეს და თაბაშირში ჩაუსვეს მენჯი… მამას აღარაფერი ეშველება, მაგრამ მინდა იცოდეთ ამ კლინიკის უსინდისო ზოგიერთ მედპერსონალზე, რომლებზეც აქამდე დიდ იმედებს ვამყარებდით. საქმის კურსშია სახელმწიფო რეგულირების სააგენტო. ველოდებით მათგან საქმის შესწავლას და მკაცრ რეაგირებას.“ – ამბობს პაციენტის შვილი მთავართან და ფოტოს აგზავნის.