ხალხს აჩვენებენ, რომ ცნობილ სახეებს იბარებენ იმასთან დაკავშირებით, რაც ღარიბაშვილმა თქვა, რადგან ეს ადამიანები არაფერს ამბობენ დამატებითი ცნობების შესახებ ლაზარე ჯორბენაძის გარდაცვალებასთან დაკავშირებით, ე.ი. არც არაფერი საეჭვო არ არსებობს , – ამის შესახებ პოლიტოლოგმა და მწერალმა გიორგი გიგაურმა ჟურნალისტებს გამოკითხვის შემდეგ განუცხადა.
მისი თქმით, მან უბრალოდ, მოახდინა ღარიბაშვილის წერილიდან ფაქტების კონსტატაცია და ინფორმაცია მიაწოდა საზოგადოებას რადგან “ღარიბაშვილი არის ქვეყნის ორგზის პრემიერ-მინისტრი, მისი კითხვები არის ლეგიტიმური და ხელისუფლებამ უნდა უპასუხოს ამ კითხვებს”.
“აინტერესებდათ რაიმე დამატებითი ინფორმაცია მაქვს თუ არა ლაზარე ჯორბენაძის იდუმალებით მოცულ გარდაცვალებასთან დაკავშირებით. მე დავუდასტურე, რომ ამის შესახებ არანაირი დამატებითი ინფორმაცია და ფაქტი არ ვიცი.
ეს არის ელემენტარული საზოგადოების, ასე ვთქვათ, დაშინების ოპერაცია. ხალხს აჩვენებენ, რომ ცნობილ სახეებს იბარებენ იმასთან დაკავშირებით, რაც ღარიბაშვილმა თქვა, რადგან ეს ადამიანები არაფერს ამბობენ დამატებითი ცნობების შესახებ ლაზარე ჯორბენაძის გარდაცვალებასთან დაკავშირებით, ე.ი. არც არაფერი საეჭვო არ არსებობს. მე მეწერა ის, რაც თქვა ღარიბაშვილმა.
ღარიბაშვილის მიერ ნათქვამი წერილიდან ფაქტების კონსტატაცია, ანუ მისი აზრების კონსტატაცია და ვამბობდი, რომ ღარიბაშვილს აქვს კითხვები. ღარიბაშვილი არის ქვეყნის ორგზის პრემიერ-მინისტრი, მისი კითხვები არის ლეგიტიმური და ხელისუფლებამ უნდა უპასუხოს ამ კითხვებს.
ჯორბენაძის საქმით მე არც ახლა ვარ დაინტერესებული. ღარიბაშვილმა, ქვეყნის ყოფილმა პრემიერ-მინისტრმა, საზოგადოებისთვის ძალიან საინტერესო პირმა, პატიმრობაში მყოფმა, გაავრცელა ინფორმაცია იმის თაობაზე, რომ მას კითხვები აქვს ჯორბენაძის მკვლელობასთან დაკავშირებით. მე ეს საზოგადოებას მივაწოდე, რომ ამ პირს, ღარიბაშვილს, კითხვები აქვს. საზოგადოების ინფორმირება იყო, მეტი არაფერი” , – განაცხადა გიგაურმა.
ცნობისთვის, საქართველოს ყოფილმა პრემიერ-მინისტრმა, ირაკლი ღარიბაშვილმა საპატიმროდან მორიგი წერილი გამოაქვეყნა, რომელშიც სვამს კითხვას, „რა გახდა უფლებადამცველი ლაზარე ჯორბენაძის გარდაცვალების რეალური მიზეზი?“ და ამბობს, რომ საზოგადოებაში „დღემდე რჩება პასუხგაუცემელი კითხვები არაერთი ადამიანის თვითმკვლელობის ფაქტთან დაკავშირებით, რომლებსაც ადგილი ჰქონდა კობახიძე-მდინარაძის მმართველობის დროს“.დღეს კი პროკურატურამ გაავრცელა განცხადება, რომელშიც დაადასტურა, ლაზარე ჯორბენაძის თვითმკვლელობის ფაქტი, თუმცა მსჯავრდებულ ირაკლი ღარიბაშვილისა და სხვა პირების მიერ საჯაროდ გაკეთებული განცხადებების საფუძველზე, პროკურატურის ზედამხედველობით, შინაგან საქმეთა სამინისტროში მიმდინარე გამოძიების ფარგლებში, გამოიკითხებიან ნიკა გვარამია; ირმა ინაშვილი; ნანუკა ჟორჟოლიანი; ხატია დეკანოიძე; თაზო დათუნაშვილი; გია ხუხაშვილი; გიორგი ლილუაშვილი; ზაზა დავითაია; ერმილე ნემსაძე; გიორგი გიგაური.