“გამოკითხვაზე დაგვიბარეს ყველა ის ადამიანი, რომლებმაც სწორი ეჭვები გამოვთქვით…” – რას ამბობს ნანუკა ჟორჟოლიანი

“გამოკითხვაზე დაგვიბარეს ყველა ის ადამიანი, რომლებმაც სწორი ეჭვები გამოვთქვით. ამან პრემიერმინისტრი ცოტა, როგორც ჩანს, აანერვიულა და გადაწყვიტა გამოგვიგზავნოს შეტყობინება, რომ თუ ამ თემაზე ბევრს დაწერთ – მოგიწევთ გამოკითხვებზე სიარული. ჩემი პასუხია, რომ ამ თემაზე გაცილებით მეტს დავწერ, ვიდრე ვწერდი. ხვალ აუცილებლად მივალ სასამართლოში და მოვყვები რა ვიცი ამ ამბის შესახებ. ვიცი ის რომ, ივანიშვილის ძალიან სანდო და ახლო ადამიანმა, მისმა ყველაზე საიმედო ვეზირმა გვითხრა, რომ მოქმედი პრემიერმინისტრისა და ყოფილი სუს-ის უფროსის სახელები უკავშირდება საეჭვოდ გარდაცვლილი ადამიანების საქმეებს.“ – ამბობს ნანუკა ჟორჟოლიანი და ვიდეომიმართვას ავრცელებს.
დღეს პროკურატურამ გაავრცელა განცხადება: “2026 წლის 4 აპრილს ლაზარე ჯორბენაძის თვითმკვლელობის ფაქტზე, შინაგან საქმეთა სამინისტროში მიმდინარე გამოძიების ფარგლებში, ჩატარებულია არაერთი საგამოძიებო და საპროცესო მოქმედება. გამოკითხულია გარდაცვლილთან შემხებლობაში მყოფი პირები, მათ შორის, გარდაცვლილის ოჯახის წევრები და მეუღლე, რის საფუძველზეც, ამ ეტაპზე, უტყუარად დადასტურებულია თვითმკვლელობის ფაქტი.მიუხედავად ზემოაღნიშნულისა, მსჯავრდებულ ირაკლი ღარიბაშვილისა და სხვა პირების მიერ საჯაროდ გაკეთებული განცხადებების საფუძველზე, პროკურატურის ზედამხედველობით, შინაგან საქმეთა სამინისტროში მიმდინარე გამოძიების ფარგლებში, გამოიკითხებიან ნიკა გვარამია; ირმა ინაშვილი; ნანუკა ჟორჟოლიანი; ხატია დეკანოიძე; თაზო დათუნაშვილი; გია ხუხაშვილი; გიორგი ლილუაშვილი; ზაზა დავითაია; ერმილე ნემსაძე; გიორგი გიგაური. აღნიშნულ სისხლის სამართლის საქმეზე ასევე გამოიკითხება ირაკლი ღარიბაშვილი. მაღალი საჯარო ინტერესის გათვალისწინებით, აღნიშნული პირების გამოკითხვის შედეგების შესახებ, ლაზარე ჯორბენაძის თვითმკვლელობის ფაქტთან დაკავშირებით, თუ რაიმე ახალი გარემოებები გახდა ცნობილი, საზოგადოებას დამატებით მივაწვდით ინფორმაციას.“ – წერია პროკურატურის განცხადებაში.