დაპირისპირება „ბათუმი პლაზასთან“ – სიგარეტებით მოვაჭრე კაცი დაკავების დროს შეუძლოდ გახდა

ცოტა ხნის წინ ხმაური იყო ბათუმის ცენტრში – ფინანსთა სამინისტროს საგამოძიებო სამსახურის განცხადებით, „ბათუმი პლაზასთან“ დააკავეს ერთი ადამიანი, რომელიც მათი განცხადებით უაქციზო სიგარეტს ყიდდა.

კაცი დაკავებისას შეუძლოდ გახდა, პლაზასთან მყოფმა მოქალაქეებმა კი მისი დაცვა სცადეს, რასაც ადგილზე სიტყვიერი და ფიზიკური დაპირისპირება მოჰყვა.

ფინანსური პოლიცია ამბობს, რომ საგამოძიებო მოქმედებების პარალელურად, ბრალდებულისა და სხვა პირების მხრიდან ადგილი ჰქონდა საგამოძიებო სამსახურის თანამშრომლებისთვის საქმიანობის განხორციელებაში ხელის შეშლის ფაქტს.

“საქართველოს ფინანსთა სამინისტროს საგამოძიებო სამსახურის თანამშრომლებმა, აჭარის რეგიონში ჩატარებული საგამოძიებო მოქმედებების შედეგად, აქციზური მარკის სავალდებულო დართვას დაქვემდებარებული დიდი ოდენობით უაქციზო სიგარეტის სისტემატური შენახვა-რეალიზაციის ფაქტზე ერთი პირი დააკავეს.
გამოძიებით დადგინდა, რომ წარსულში ანალოგიური დანაშაულისთვის ნასამართლევი პირი თამბაქოს ნაწარმს ავტომანქანებში მალავდა და მის საცალო რეალიზაციას ქალაქ ბათუმში, „ბათუმი პლაზას“ მიმდებარე ტერიტორიაზე ახორციელებდა.
ჩატარებული ჩხრეკისა და სხვა საგამოძიებო მოქმედებების შედეგად, ამოღებულია დიდი ოდენობით უაქციზო სიგარეტი, რომლის საბაზრო ღირებულება 5 000 ლარს აღემატება.
აღსანიშნავია, რომ დაკავებული პირი წარსულში არაერთხელ არის მხილებული მსგავს უკანონო საქმიანობაში. ერთ სისხლის სამართლის საქმეზე მის მიმართ უკვე დამდგარია გამამტყუნებელი განაჩენი, ხოლო მეორე საქმეზე არსებითი განხილვა ბათუმის საქალაქო სასამართლოში მიმდინარეობს.
საგამოძიებო მოქმედებების პარალელურად, ბრალდებულისა და სხვა პირების მხრიდან ადგილი ჰქონდა საგამოძიებო სამსახურის თანამშრომლებისთვის საქმიანობის განხორციელებაში ხელის შეშლის ფაქტს, რა დროსაც მათ თანამშრომლებს ფიზიკური და სიტყვიერი შეურაცხყოფა მიაყენეს.
გამოძიება გრძელდება საქართველოს სისხლის სამართლის კოდექსის 200-ე მუხლის მე-2 ნაწილის „ბ“ ქვეპუნქტით, რაც სასჯელის სახით 4-დან 6 წლამდე ვადით თავისუფლების აღკვეთას ითვალისწინებს.
ფინანსთა სამინისტროს საგამოძიებო სამსახური მოუწოდებს მოქალაქეებს თავი შეიკავონ მსგავსი უკანონო ქმედებებისგან, რადგან სამსახურის რეაგირება ნებისმიერ შემთხვევაში იქნება მკაცრი”- წერია გავრცელებულ განცხადებაში.