აშშ-ის პრეზიდენტი დონალდ ტრამპი აცხადებს, რომ ამერიკის შეერთებული შტატები ჰორმუზის სრუტის სიახლოვეს ირანის სამიზნეებზე დარტყმებს ახორციელებს. ამის შესახებ ტრამპი სოციალურ ქსელში წერს.
„ამერიკის შეერთებული შტატები, ამ წუთებში, ჰორმუზის სრუტის მახლობლად ირანის სამიზნეებს უტევს. დარტყმები მასშტაბური და ძლიერი იყო და ეს ირანელების მიერ სრუტეში საზღვაო ნაღმების განთავსების წარუმატებელ მცდელობას მოჰყვა. ამჟამად სრუტეში ნაღმები არ არის – ისინი სრულად იყო ამოღებული“, – წერს ტრამპი.
მისივე განცხადებით, აშშ-ის დარტყმები ასევე უკავშირდება ირანის მიერ იორდანიაში მდებარე ამერიკული სამხედრო ბაზის მიმართულებით რვა რაკეტის გაშვებას.
„რვავე რაკეტა წარმატებით იყო ჩამოგდებული“, – აცხადებს აშშ-ის პრეზიდენტი.
„ირანის წარუმატებელი სახელმწიფო ამ სრულიად გამართლებული თავდასხმის საპასუხოდ დარტყმას თუ შეეცდება, მათ კიდევ უფრო ძლიერად და უფრო მასშტაბურად დავარტყამთ. თუმცა ეს არ იქნება ყველაზე დიდი თავდასხმა – ყველაზე მასშტაბური თავდასხმა ჯერ კიდევ წინ არის და, როდესაც ის დასრულდება, ირანის ისლამური რესპუბლიკისგან ძალიან ცოტა რამ დარჩება“, – წერს ტრამპი.