დაურ ბუავას საქმეზე დაკავებული ვიქტორია კირილიუკი საქალაქო სასამართლოში გადაიყვანეს. “პირველების” ინფორმაციით, ქალი გამოძიების ამ ეტაპზე დუმილის უფლებას იყენებს. ჯერჯერობით უცნობია, ისაუბრებს თუ არა ის მოსამართლესთან მომხდარის დეტალებზე.
დეტალებზე არ საუბრობს არც დაკავებული ქალის ადვოკატი. ჯერჯერობით უცნობია, რა შუამდგომლობით შევა ის პროცესზე.
ჩემი დაცვის ქვეშ მყოფი იყენებს დუმილის უფლებას, დღეს ახალს ვერაფერს მოგახსენებთ გამომდინარე ჩემი დაცვის ქვეშ მყოფის უფლებებიდან. დამატებით ვერაფერს მოგახსენებთ, – ამბობს კირილიუკის ადვოკატი.
ცნობილია, რომ ბრალდების მხარე პატიმრობას ითხოვს. პროცესს დაესწრებიან დაურ ბუავას ინტერესების დამცველებიც.
ვიქტორია კირილიუკს ბრალად განსაცდელში მიტოვება ედება.
შსს-ს ცნობით, ჩატარებული გამოძიებით დგინდება, რომ ბრალდებულის სახით დაკავებული უცხო ქვეყნის მოქალაქე და დაურ ბუავა მეგობრები იყვნენ. ისინი თბილისში, დიდ დიღომში, დაურ ბუავას დროებით საცხოვრებელ ბინაში ერთად იმყოფებოდნენ, სადაც მოიხმარეს ნარკოტიკული საშუალება, რის შემდეგაც ორივე მათგანი შეუძლოდ გახდა.
ბრალდებულის გამოკითხვის შედეგად ირკვევა, რომ შეუძლოდ მყოფი დაურ ბუავა, რომელიც იმყოფებოდა კრიტიკულად მძიმე და სიცოცხლისთვის საშიშ მდგომარეობაში, მან მარტო დატოვა.
შეგახსენებთ, რომ დაურ ბუავას ცხედარი ამ დრომდე ექსპერტიზის ბიუროში რჩება. საქმეზე სულ 3 პირია დაკავებული.
გამორიცხული არ არის, ბრალდებულთა წრე კიდევ გაფართოვდეს.