თბილისის მუნიციპალურ ავტობუსებზე Wildberries-ის რეკლამები გამოჩნდა.
აღნიშნულ ინფორმაციას Netgazet ავრცელებს და წერს, რომ საიტზე მითითებული ინფორმაციის მიხედვით, საქართველოს მასშტაბით ამ კომპანიას 90 გაცემის პუნქტი აქვს, მათ შორის თბილისში, ბათუმში, ქუთაისში, ზუგდიდში, გორში.
„მერია არ იღებს რეკლამების განთავსებაზე არანაირ გადაწყვეტილებას, შესაბამისად, უნდა მიმართოთ „ალმას“ – უთხრეს Netgazet-ს მერიაში.
Wildberries რუსეთის უმსხვილესი მარკეტპლეისია. პლატფორმას ყოველთვიურად დაახლოებით 79 მილიონი ადამიანი იყენებს. Wildberries უკრაინამ 2021 წელს დაასანქცირა. 2022 წლიდან კომპანია პოლონეთსაც ჰყავს სანქციების სიაში შეყვანილი.
საერთაშორისო ონლაინ სავაჭრო პლატფორმა Wildberries საქართველოში 2024 წლის შემოდგომაზე ოფიციალურად შემოვიდა.