აბიტურიენტებისთვის ხვალ ერთ-ერთი ყველაზე მნიშვნელოვანი ვადა იწურება – საგანმანათლებლო პროგრამების რეიტინგულ სიაში ცვლილებების შეტანა 20 აგვისტოს, 18:00 საათამდეა შესაძლებელი. შესაბამისად, მათ, ვისაც უნივერსიტეტების ან პროგრამების ჩამონათვალის შეცვლა, დამატება, წაშლა ან მათი თანმიმდევრობის გადახედვა სურს, ამისთვის მხოლოდ ხვალამდე აქვთ დრო.
შეფასებისა და გამოცდების ეროვნულმა ცენტრმა აბიტურიენტთა საბოლოო, გათანაბრებული და სკალირებული ქულები უკვე გამოაქვეყნა. საბოლოო შედეგებთან ერთად აბიტურიენტებს პირად გვერდზე შეუძლიათ ნახონ როგორც გათანაბრებული, ისე სკალირებული ქულებიც.
ცენტრი განმარტავს, რომ იმ საგნებში, რომლებშიც გამოცდა ერთზე მეტი ვარიანტით ჩატარდა, ნედლი ქულების გათანაბრება ხდება. სწორედ გათანაბრების შედეგად განისაზღვრება, გადალახა თუ არა აბიტურიენტმა კონკრეტულ საგანში დადგენილი მინიმალური კომპეტენციის ზღვარი. თუ გათანაბრებული ქულა მინიმალურ ზღვარზე მეტია, აბიტურიენტი კონკურსში მონაწილეობას აგრძელებს.
ამ ეტაპზე აბიტურიენტებისთვის განსაკუთრებით მნიშვნელოვანია კიდევ ერთხელ გადაამოწმონ საკუთარი საგანმანათლებლო პროგრამების რეიტინგული სია. მათ შეუძლიათ შეცვალონ პროგრამების თანმიმდევრობა, დაამატონ ახალი პროგრამები ან ამოიღონ ის არჩევანი, რომელზეც სწავლა აღარ სურთ.
ცვლილებების შეტანის ბოლო ვადაა 20 აგვისტო, 18:00 საათი. ამ დროის გასვლის შემდეგ პროგრამების რეიტინგული სიის შეცვლა აღარ იქნება შესაძლებელი და ჩარიცხვისას გათვალისწინებული იქნება აბიტურიენტის მიერ საბოლოოდ დაფიქსირებული არჩევანი.
საბოლოო, გათანაბრებული და სკალირებული ქულების ნახვა აბიტურიენტებს შეფასებისა და გამოცდების ეროვნული ცენტრის პირად გვერდზე შეუძლიათ.
“2026 წლის ერთიანი ეროვნული გამოცდების მონაწილეების საყურადღებოდ – პროგრამების რეიტინგულ სიაში ცვლილებების შეტანის ვადა აბიტურიენტებისათვის 20 აგვისტოს 18:00 საათზე იწურება.შეფასებისა და გამოცდების ეროვნული ცენტრი სთხოვს ერთიან ეროვნულ გამოცდებში მონაწილეებს, საკუთარ გვერდზე კიდევ ერთხელ ყურადღებით გაეცნონ სასურველ საგანმანათლებლო პროგრამებზე არსებულ კონკურსს, მიღებულ შედეგს და შესაბამისად შეადგინონ პროგრამების საბოლოო პრიორიტეტული ჩამონათვალი.გასათვალისწინებელია, რომ აბიტურიენტებს შესაძლებლობა აქვთ აირჩიოთ მათთვის სასურველი რაოდენობით საგანმანათლებლო პროგრამები.ამოსაცდელებმა პროგრამების არჩევისას ყურადღება უნდა მიაქციონ:გაზრდილია თუ არა უმაღლესი საგანმანათლებლო დაწესებულების მიერ მინიმალური კომპეტენციის ზღვარი კონკრეტულ პროგრამაზე;საგანმანათლებლო პროგრამაზე არსებული ადგილების რაოდენობას;საგანმანათლებლო პროგრამის სწავლის საფასურს;ქალაქს, სადაც შესაბამისი საგანმანათლებლო პროგრამა ხორციელდება.”