“ვეცადოთ, გავხდეთ უფრო მომთმენი, დავიწყოთ მოთმინება, ვეცადოთ, არ ვთქვათ ადამიანზე ცუდი…” – რას ამბობს პატრიარქი შიო III

“როგორ უნდა დავიწყოთ ჩვენ ფერისცვალება, როგორ უნდა მოხდეს ჩვენში და რით დავიწყოთ? უნდა დავიწყოთ ჩვენი მოყვასით, მოყვასთან ურთიერთობის გამოსწორებით, ვეცადოთ, გავხდეთ უფრო მომთმენი, დავიწყოთ მოთმინება, ვეცადოთ, არ ვთქვათ ადამიანზე ცუდი, არ ვუპასუხოთ შურისძიებით, ვეცადოთ, მოვემსახუროთ ადამიანებს, დავეხმაროთ, ვეცადოთ, შევუმსუბუქოთ, თუ გნებავთ, სნეულების სიმძიმე, სხვა რაიმე სიმძიმე. ასე თუ ვიშრომებთ, ვეცდებით, მაშინ უფალიც შეგვეწევა, თავის მადლს მოგვცემს და შეიძლება, რამდენიმე თვე გავა თუ წელი, აღმოვაჩენთ, ჩვენში ცვლილება მოხდა. თუ ზარმაცია ადამიანი, შეიძლება, გახდეს შრომისმოყვარე; სევდიანი და მოწყენილი ადამიანი, შეიძლება, გახდეს ხალისიანი და ომახიანი; ამპარტავანი, შეიძლება, გახდეს თავმდაბალი; ხარბი – ხელგაშლილი, ნაყროვანი – მმარხველი; ბრაზიანი, უკმაყოფილო ადამიანი, შეიძლება, გახდეს ლმობიერი, მოსიყვარულე, კეთილგანწყობილი ადამიანი; ნელ-ნელა არა მხოლოდ ჩვენში მოხდება ფერისცვალება, არამედ ჩვენ ირგვლივაც ფერს იცვლიან ჩვენი ახლობლები, ოჯახის წევრები. ისინი ასეთ ადამიანში, ვინც ფერს იცვლის, ვინც სწორდება, ვინც სულიერად ცხოვრობს, ხვდებიან, ეხებიან სიყვარულს, დახმარებას, მოთმინებას, სათნოებებს, მზაობას, რომ ყველანაირი სიკეთე გააკეთონ და არა პირიქით, აწყენინონ, დაჩაგრონ, უგულებელყონ, წაართვან და მოატყუონ და ა.შ. სწორედ ეს სურს უფალს ჩვენგან, ამ გზით ვიაროთ. მუდმივად ყოფნა განკითხვაში, უკმაყოფილებაში, მრისხანებაში და სხვა ვნებებში ძალიან მძიმეა, მტკივნეულია ასეთი ცხოვრება. ასეთი ცხოვრება ნამდვილი ჯოჯოხეთია და ამ ჯოჯოხეთიდან, ნებავს უფალს, ჩვენ გამოგვიყვანოს და გაგვათავისუფლოს. ამიტომ მოგვიწოდებს ფერისცვალებისკენ, ეს არის ჩვენი მოწოდება… “[პირველი არხი] – თქვა პატრიარქმა შიო III სამთავროს წმინდა ნინოს სახელობის დედათა მონასტერში, ფერისცვალების სახელობის ტაძარში ქადაგებისას.