ირაკლი კობახიძის განცხადების შემდეგ, გეორგიევსკის ტრაქტატზე განმარტებებს გია ვოლსკიც აკეთებს. „ქართული ოცნების“ დეპუტატი აღიარებს, რომ რუსეთმა 1783 წელს გაფორმებული ხელშეკრულების პირობები არ შეასრულა და საქართველომ არაერთი მძიმე დარტყმა მიიღო, თუმცა, ამის მიუხედავად, ტრაქტატის ისტორიულ შედეგს დადებითად აფასებს და ამბობს, რომ საბოლოოდ საქართველომ „როგორც ერმა და ნაციამ“ გაქრობას თავი აარიდა.
1783 წელს გაფორმებული გეორგიევსკის ტრაქტატის შემდეგ საქართველომ არაერთი სერიოზული დარტყმა მიიღო ისე, რომ ამ ტრაქტატის პირობები რუსეთს არ შეუსრულებია, ეს დაიწყო მოგვიანებით, როდესაც რუსეთს ეს აწყობდა. გარკვეული პერიოდი საქართველომ განიცადა ძალიან მძიმე პერიოდი… საბოლოო ჯამში, იმაზე იმუშავა, რომ საქართველო არ გახდა, ვთქვათ, რომელიმე მუსლიმური კულტურის და საკმაოდ აგრესიული მეზობლის ვასალი ან საერთოდ, არ გაქრა როგორც ერი და ნაცია, – ამბობს ვოლსკი.
ირაკლი კობახიძე ერეკლე მეორის მიერ რუსეთის იმპერიასთან გეორგიევსკის ტრაქტატის გაფორმებას „ერთადერთ სწორ და უალტერნატივო გადაწყვეტილებად“ აფასებს და ამტკიცებს, რომ სწორედ ამ ნაბიჯმა ქართველი ერის გადარჩენასა და საბოლოო გამარჯვებას შეუწყო ხელი. ამის შესახებ ირაკლი კობახიძემ საგანგებო ბრიფინგზე ისაუბრა, სადაც აღნიშნულ საკითხზე საუბარს 11 წუთი მიუძღვნა.
მთავრობის მეთაურის შეფასებით, მიუხედავად იმისა, რომ რუსეთის იმპერია საკუთარი ინტერესებით მოქმედებდა, საქართველომ ტრაქტატის გაფორმებით „პრინციპული სარგებელი“ მიიღო.