მთელი უსამშობლოთა კოჰორტა აამუშავეს უაზრო იდეის დასამკვიდრებლად, მაგრამ ტყუილად ცდილობენ – ქართველებს თავიდან საკუთარ ტერიტორიებს ვერავინ ამოუშლის, – განუცხადა ჟურნალისტებს თავდაცვის კომიტეტის თავმჯდომარის მოადგილე, თენგიზ შარმანაშვილმა.
დეპუტატი აფხაზეთთან დაკავშირებით ოპოზიციის წარმომადგენლების – ნიკა გვარამიას მიერ აფხაზეთის „ტრავმულ მეხსიერებად“ მოხსენიებასა და ყარაბაღის დათმობის მაგალითად მოყვანას, ასევე სალომე სამადაშვილის განცხადებას, რომ საქართველო აფხაზებისთვის უკეთეს ალტერნატივას ვერ ქმნის, ეხმიანება.
„ეს ტრავმული მეხსიერება კი არაა, ესაა ჩვენი სამშობლო. რაც შეეხება ყარაბაღთან შედარებას, ყარაბაღი იყო აზერბაიჯანის ოფიციალური ტერიტორია, რომელიც გაერთიანებული ერების ორგანიზაციას ჰქონდა ნაცნობი, როგორც აზერბაიჯანის ტერიტორია. ისევე, როგორც გაერთიანებული ერების ორგანიზაციას ცხინვალის და აფხაზეთის რეგიონი საქართველოს ტერიტორიად აქვს ცნობილი და ერთი-ორი გამონაკლისი ქვეყნის გარდა, საერთაშორისო საზოგადოება ასე ცნობს.
როგორ შეიძლება ამის ერთმანეთთან შედარება?! მინდა ვუპასუხო ამ საცოდავებს, სხვა სიტყვას ვერ ვპოულობ, ტრავმული მეხსიერება კი არ არის, ჩვენი სამშობლოა და მისი ნაწილია, თქვე უსამშობლოებო მართლა. როგორ შეიძლება ამ თემაზე საერთოდ ლაპარაკი?! მთელი უსამშობლოთა კოჰორტა აამუშავეს უაზრო იდეის დასამკვიდრებლად, მაგრამ ტყუილად ცდილობენ – ქართველებს თავიდან საკუთარ ტერიტორიებს ვერავინ ამოუშლის“, – აღნიშნა შარმანაშვილმა.