“ყველაზე მძიმე და სამარცხვინო ის არის, რომ “ქართული ოცნება” გმირების საფლავთან ვერ ამბობს, ვინ არის მტერი და ოკუპანტი” – ასე აფასებს “ერთიანი ნაციონალური მოძრაობის” ერთ-ერთი ლიდერი, ლაშა ფარულავა მიხეილ ყაველაშვილისა და ირაკლი კობახიძის მიერ გაკეთებულ განცხადებებს 2008 წლის რუსეთ-საქართველოს ომის წლისთავთან დაკავშირებით.
ფარულავას თქმით, ბიძინა ივანიშვილის მიერ დაფუძნებული პარტიის წარმომადგენლები “რუსეთის ხსენებას ვერ ბედავენ”.
“ლაპარაკობენ წინა ხელისუფლებაზე, ყველაფერს აბრალებენ მიხეილ სააკაშვილს, რომელიც მათი პოლიტიკური ტყვეა. საუბრობენ რეზოლუციაზე, არ საუბრობენ იმ საერთაშორისო შეფასებებზე, რომელიც საფუძვლად დაედო მათ შორის საერთაშორისო სასამართლოებში საქართველოს გამარჯვებას. რუსეთი არის მტერი, რუსეთი არის ოკუპანტი, დიდება გმირებს! – ეს არის დღეს, 18 წლის შემდეგ მთავარი სათქმელი და არა ის რასაც ამბობს და აკეთებს “ქართული ოცნება” – განაცხადა ფარულავამ.
„ქართული ოცნება“ 2008 წლის აგვისტოს ომის დაწყების თარიღად 8 აგვისტოს მიიჩნევს – რუსული აგრესიის მე-18 წლისთავზე პარტიის ლიდერები ომში დაღუპულთა მემორიალთან დღეს, 8 აგვისტოს გამოჩნდნენ.
ოპოზიციური პარტიები გმირების მ მემორიალთან 7 აგვისტოს მიდიან. მათი თქმით 8 აგვისტოს ომის დაწყების მტკიცება რუსეთის ინტერესებში შედის – 7 აგვისტოს, პირველი რუსული შეიარაღებული ძალები შემოვიდნენ საქართველოს ტერიტორიაზე.
„ქართული ოცნების“ ლიდერებმა პოლიტიკური განცხადებები გააკეთეს და ომის დაწყებაში კიდევ ერთხელ დაადანაშაულეს მიხეილ სააკაშვილის ხელისუფლება. ბიძინა ივანიშვილის მიერ დაფუძნებული პარტიის ლიდერები ცდილობენ, “ნაციონალური მოძრაობის” ხელისუფლება საქართველოსგან გამიჯნონ.
2024 წლის სექტემბერს, ბიძინა ივანიშვილმა “ნაციონალური მოძრაობის” ხელისუფლების წარმომადგენლებს “ომის გამჩაღებლები” უწოდა.