საქართველოს ეროვნული საკალათბურთო ნაკრების კაპიტანი თორნიკე შენგელია კარიერას ევროლიგის გუნდში, „დუბაიში“ გააგრძელებს, – ინფორმაცია კლუბმა ოფიციალურად დაადასტურა.
„„დუბაიმ“ მომდევნო, 2026/2027 წლების სეზონის წინ, წინა ხაზი საქართველოს ნაკრების ლიდერის, თორნიკე შენგელიას დამატებით გააძლიერა. გამოცდილი მძიმე ფორვარდი გუნდს „ბარსელონაში“ გატარებული სეზონის შემდეგ უერთდება. ის კარიერაში ახალ ეტაპს იწყებს და დუბაიში ევროლიგის უდიდესი, ათწლიანი გამოცდილება მიაქვს.
ევროპის ერთ-ერთი საუკეთესო ფორვარდი
ევროლიგის 34 შეხვედრაში ქართველი კალათბურთელი საშუალოდ 12.4 ქულასა და 4.6 მოხსნას აგროვებდა. რაც შეეხება ესპანეთის ჩემპიონატს (Liga ACB), მან 40 მატჩში მიიღო მონაწილეობა, აქტივში საშუალოდ 11.2 ქულა ჩაიწერა და კატალონიურ გრანდს ფინალში გასვლაში დაეხმარა.
2.06 მეტრი სიმაღლის შენგელია ევროპაში ერთ-ერთ საუკეთესო მძიმე ფორვარდად მიიჩნევა. იგი გამოირჩევა ფიზიკური ძალით, უნივერსალურობითა და ლიდერული თვისებებით როგორც მოედანზე, ისე მის მიღმა. თორნიკე სტაბილურად უმაღლეს დონეზე ასპარეზობს – ის იდეალურად უთავსებს ერთმანეთს პერიმეტრიდან თუ ფარქვეშიდან შეტევას, საიმედო თამაშს მოხსნებზე და გუნდის ორგანიზებას“, – წერს „დუბაის“ ოფიციალური გვერდი.
საკალათბურთო კლუბი „დუბაი“ 2023 წელს დაარსდა. 2026/2027 წელს გუნდი ევროპის მთავარ საკლუბო გათამაშებაში, ევროლიგაში იასპარეზებს, ასევე მონაწილეობას მიიღებს ადრიატიკის ლიგის გათამაშებაში.
მოახლოებული სეზონის წინ გუნდი გამოცდილმა სპეციალისტმა, ხავიერ პასკუალემ ჩაიბარა, რომელთან ერთადაც შენგელია „ბარსელონაში“ მუშაობდა. „დუბაის“ მიზანი აქვს, მიიზიდოს ევროპაში მოთამაშე მაღალი დონის კალათბურთელები და ტიტულებისთვის ბრძოლა დაიწყოს.