“ჩვენ გვინდა, რომ ლეგიტიმური იყოს მთავრობა…” – რას ამბობს ლევან გულუაშვილი

„გვინდა, ცოტა დავეხმაროთ ჩვენს დღევანდელ ხელისუფლებას იმის გარკვევაში, საზოგადოებას რა უჭირს. ჩვენ გვინდა, რომ ლეგიტიმური იყოს მთავრობა“, – ამის შესახებ “რადიო თავისუფლებას” პარტია „მამული, ენა, სარწმუნოების“ წევრმა ლევან გულუაშვილმა განუცხადა.
საინიციატივო ჯგუფი, რომლის წევრიც გულუაშვილია, ითხოვს რეფერენდუმზე გაიტანონ კითხვა: „ეთანხმებით თუ არა, რომ საქართველოს მოქმედი პარლამენტი წარმოადგენს ქართველი ხალხის ნდობის მანდატზე დაფუძნებულ ლეგიტიმურ წარმომადგენლობით ორგანოს?”.
ინიციატივა ცენტრალურ საარჩევნო კომისიას, გუშინდელ, 5 აგვისტოს, სხდომაზე უნდა განეხილა. კომისიის თავმჯდომარის, გიორგი კალანდარიშვილის განცხადებით, პირველ ეტაპზე სარეფერენდუმო კითხვა საინიციატივო ჯგუფთან შეთანხმებით ზუსტდება, თუმცა, მისივე თქმით, სხდომაზე საინიციატივო ჯგუფიდან არავინ მისულა. კალანდარიშვილი აცხადებს, რომ ცესკომ სხდომის შესახებ შეტყობინება გააგზავნა, თუმცა ლევან გულუაშვილი რადიო თავისუფლებას ეუბნება, რომ ინფორმაცია არ ჰქონია.