ფრანგმა მოდელმა თაილენ ბლონდომ, რომელსაც Vogue Enfants-მა წლების წინ “მსოფლიოში ყველაზე ლამაზი გოგონა“ უწოდა, ქორწილიდან ერთი თვის შემდეგ თავისი განსაკუთრებული საქორწილო კაბის შექმნის ისტორია გაუზიარა საზოგადოებას.
მოდელი გასულ თვეში ფრანგ დიჯეი ბენ ატალზე დაქორწინდა. ცერემონიისთვის მან Miu Miu-ს სპეციალურად შექმნილი მაქმანებიანი საქორწინო კაბა მოირგო.
Instagram-ზე გამოქვეყნებულ პოსტში ბლონდომ აღნიშნა, რომ ამ ბრენდის საქორწინო კაბის ჩაცმა მისი “ყველაზე გიჟური ოცნება“ იყო.
“ვერასდროს წარმოვიდგენდი, რომ ერთ დღეს ჩემი ოცნების კაბას Miu Miu შექმნიდა. მისი დამზადებისთვის 30 მეტრზე მეტი ფრანგული მაქმანი იყო საჭირო. თითოეული დეტალი უდიდესი ყურადღებითა და ოსტატობით შეიქმნა”, – დაწერა მოდელმა.
მისი თქმით, Miu Miu-სთან თანამშრომლობა 16 წლის ასაკში დაიწყო და მაშინ ვერც წარმოიდგენდა, რომ წლების შემდეგ სწორედ ეს მოდის სახლი მისი ცხოვრების ერთ-ერთი ყველაზე მნიშვნელოვანი დღისთვის კაბას შექმნიდა.
“ეს მოგონება სამუდამოდ დარჩება ჩემთან. მადლობა ყველას, ვინც ეს ოცნება ამიხდინა”, – აღნიშნა ბლონდომ.
ქორწილი ტოსკანური სტილის მამულში, Chateau Diter-ში გაიმართა. სასახლე მოიცავს 18 ლუქსს, იტალიურ ბაღებს, მარილიანი წყლის აუზს, შუა საუკუნეების მონასტერს, ღვინის სარდაფსა და ვერტმფრენის დასაჯდომ მოედანს.
გავრცელებული ინფორმაციით, მხოლოდ სივრცის დაქირავების საწყისი ღირებულება 17 ათასი ფუნტი სტერლინგია, თუმცა დეკორაციებისა და დამატებითი მომსახურების გათვალისწინებით, საბოლოო ბიუჯეტი გაცილებით მაღალია.
თილენ ბლონდი მოდის სამყაროში ძალიან პატარა ასაკიდან გამოჩნდა. ოთხი წლის იყო, როდესაც ჟან-პოლ გოტიეს ჩვენებაზე გამოვიდა, ხოლო ათი წლის ასაკში Vogue Paris-ის ყველაზე ახალგაზრდა მოდელი გახდა.
მსოფლიო პოპულარობა კი ხუთი წლის ასაკში მოიპოვა, როდესაც Vogue Enfants-მა “მსოფლიოში ყველაზე ლამაზ გოგონად“ დაასახელა. მოგვიანებით, 2018 წელს, მან TC Candler-ის მსოფლიოს ყველაზე ლამაზი სახეების რეიტინგშიც პირველი ადგილი დაიკავა.