საგარეჯოს მუნიციპალიტეტის სოფელ ბადიაურში, მუნიციპალური ავტობუსი გზის სავალი ნაწილიდან გადავიდა და გადაბრუნდა.
ავტოსაგზაო შემთხვევას ავტობუსის მძღოლი ემსხვერპლა. დაშავდა 2 მგზავრი, რომლების სასწრაფო სამედიცინო დახმარების ჯგუფმა საავადმყოფოში გადაიყვანა. ერთი მათგანი ბინაზე უკვე გაეწერა, მეორე კი კლინიკაში რჩება, ექიმების შეფასებით, მის სიცოცხლეს საფრთხე არ ემუქრება.
შემთხვევის ერთ-ერთ მიზეზად, სველ გზაზე, ტრანსპორტის მოცურება სახელდება. მეორე ვერსიით, შესაძლოა, მძღოლი შეუძლოდ გახდა, რამაც ავტოსაგზაო შემთხვევა გამოიწვია.
როგორც შინაგან საქმეთა სამინისტროში აცხადებენ, მომხდარზე გამოძიება სსკ-ის 276-ე მუხლის მე-6 ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ადამიანის გარდაცვალება გამოიწვია.