“ისნის დაშლილების ბაზრობის” ტერიტორიაზე ახალი საცხოვრებელი უბნის მშენებლობაზე გარემოსდაცვითი გადაწყვეტილება გაიცა.
როგორც გამოცემა BPN. ge წერს, პროექტის განმახორციელებელმა სააქციო საზოგადოება „რეალ ინვესტმა“ სააგენტოს კორექტირებული გარემოზე ზემოქმედების ანგარიში (გზშ) 21 აპრილს წარუდგინა. კომპანია დაჩქარებული წესით ითხოვდა გზშ-ს განხილვასა და გადაწყვეტილების მიღებას, რისთვისაც ჯამში 15.5 ათასი ლარი გადაიხადა.
მათივე ცნობით, გზშ-ის ანგარიშის თანახმად, კომპანია სამ არასასოფლო-სამეურნეო დანიშნულების მიწის ნაკვეთზე, რომლის ფართობიც 17.5 ჰექტარია, ახალი საცხოვრებელი უბნის მშენებლობას გეგმავს. პროექტი მოიცავს საცხოვრებელი სივრცეების, სავაჭრო და საოფისე ფართების, სპორტული დარბაზების ან/და ფიტნეს ცენტრების, სასურსათო მაღაზიების, აფთიაქებისა და ფინანსური მომსახურების ობიექტებისთვის განკუთვნილი სივრცეების მოწყობას.
„ტერიტორიაზე მოეწყობა ერთიანი სარეკრეაციო სივრცე, რომელიც გადაკვეთს ცენტრალურ გამზირს. აღნიშნულ მონაკვეთში დაგეგმილია მიწისქვეშა გზის ჩაყვანა (560 მ სიგრძის, 12 მ სიგანის და დაახლოებით 5 მ სიღრმის მქონე მიწისქვეშა გადასასვლელი“, – ვკითხულობთ გადაწყვეტილებაში, სადაც აღნიშნულია ისიც, რომ პროექტის მიხედვით, ძირითადად შენობები 12-25 სართულის ფარგლებში იქნება, თუმცა, დაგეგმილია მაღალი შენობების განთავსებაც, კერძოდ, სავარაუდო მაქსიმალური სართულიანობა იქნება 40 მიწისზედა სართული.